एजेन्सी – ब्राजिलियन फुटबल टोलीका पूर्व खेलाडी तथा विश्व फुटबलका प्रभावशाली खेलाडी मध्यका रोनाल्डिन्हो हाल पराग्वेमा सजाय काटिरहेका छन् । उनी आफ्नो एजेन्ट दाजुसँग जाली पासपोर्ट प्रयोग गर्दै पार्ग्वे छिर्न खोजेको कारण सजाय भोग्न बाध्य भएका हुन् ।

रोनाल्डिन्होले जेलबाट मुक्त भएपनि हाल हाउस एरेस्ट (अर्थात् घरमै बन्दि हुने सुविधा) अनुरुप पाराग्वेकै एक होटेलमा छन् । यस घटनापछि पहिलोपटक संचारमाध्यमसँग बोल्दै रोनाल्डिन्होले जिन्दगीमा कहिल्यै यस्तो अवस्था आउला भनेर सोच्न समेत नसकेको बताए । खेल जीवनबाट संन्यास लिएका उनी मैदानभित्र हुँदा पनि मैदान बाहिरका घटनाका कारण चर्चामा आउंथे ।

रोनाल्डिन्होले आफ्नो जीवनमा यो अवस्था आउला भनेर कल्पना समेत नगरेको एबीसीलाई बताए । ‘ मैले कल्पना पनि गरेको थिइनँ की यस्तो अवस्था आउला । मलाई ठूलो धक्का लाग्यो । म पाराग्वे एक पुस्तक र अनलाइन क्यासिनो उद्घाटन गर्न आएको थिएँ । मेरो सबै सम्झौता र कागजहरु मेरो एजेन्टले हेर्ने गरेका छन्,’ उनले भने ।

रोनाल्डिन्होले आफ्नो पासपोर्ट नक्कली रहेको भन्नेबारे कुनै भेउ नपाएको अभिव्यक्ति दिए । ‘ जब हाम्रो कागजात गैरकानुनी छ भनेर भनियो, म स्तब्ध भएँ । हाम्रो गल्ति भएको छ भन्ने थाहा पाएपछि हामीले अदालतलाई सहयोग गरेर साँचो कुरा भन्न लाग्यौं,’ उनले भने ।

‘मलाई विश्वास थियो र प्रार्थना पनि गरेको थिएँ की सबै ठिक हुनेछ । आशा छ अब यो सबै चाडै अन्त्य हुनेछ,’ मिडफिल्डर रोनाल्डिन्होले थपे ।

रोनाल्डिन्होले जेलमा बस्नुपर्दा पनि त्यहाँ वातावरण राम्रो रहेको बताए । ‘ मलाई जेलमा परेपनि त्यहाँका मान्छे राम्रो लाग्यो । मैले त्यहाँ फुटबल खेलें, फोटो खिचें र अटोग्राफ पनि दिएँ । यो सब मेरो जीवनको पाटो हो र त्यहाँपनि मैले त्यसो गर्नु हुन्न भन्ने छैन,’ उनले भने ।

रोनाल्डिन्होले जेल बसाइका क्रममा आन्तरिक फुटसाल प्रतियोगितामा पनि सहभागिता जनाएका थिए । उनको टोलीले प्रतियोगिता जित्दै १६ केजीको सुँगुर पुरस्कार समेत पाएको थियो । हाल जेलबाट मुक्त भएर घरबन्दिमा रहेका उनको मुद्दा कोरोना संक्रमणका कारण केहि समय लाग्ने बुझिएको छ ।

यो पनि पढ्नुहोस : रोनाल्डिन्होको पक्षमा उभिए म्याराडोना