एजेन्सी – अर्जेन्टिनाका महान् खेलाडी डिएगो म्याराडोनाको प्रशिक्षणमा रहेको जिम्नासिया ला प्लाटासँगै अन्य तीन टोलीको सम्भावित रेलिगेसन टरेको छ ।

अर्जेन्टिना फुटबल एसोसिएसन (एफए) का अध्यक्ष क्लाउडियो तापियाले यो सिजनको सबै खाले फुटबलको गतिविधि रद्ध गर्ने निर्णय गरेसँगै म्यारोडोनाको टोली जिम्नासियाको रेलिगेसन टरेको हो । म्याराडोनाले सेप्टेम्वर २०१९ मा जिम्नासिया ला प्लाटाको प्रशिक्षण सम्हालेका थिए । ला प्लाटाले पछिल्ला केही खेलमा सुधार गरिरहेको थियो ।

टोली अंक तालिकाको भने पुछारमा नै रहेको थियो । अर्जेन्टिनामा पछिल्ला तीन सिजनको खेल नतिजाको आधारमा रेलिगेसन निर्धारण हुने भएकाले पनि जिम्नासिया दबाबमा थियो ।

शनिबार अर्जेन्टिनाका राष्ट्रपति अल्वेर्टाे फर्नान्डेजले लकडाउन अवधि मे १० सम्म थप्ने निर्णय गरेका थिए । यो निर्णयसँगै सुपर कोपाको प्ले अफको खेलहरु रद्द हुने भएको अध्यक्ष तापियाले थपेका छन्

लकडाउन सुरु हुनुअघि कोपा सुपर लिगाको एक चरणको खेल मात्रै सम्पन्न भएको थियो । सुपर लिगामा २४ टोली रहेको छ । पहिलो चरण १३ मार्च देखि १७ मे सम्म हुने तय थियो । त्यसपछि सेमिफाइनल २४ मे मा तथा फाइनल ३१ मे लाई तय गरिएको थियो ।

अध्यक्ष तापियाले बढुवा निरन्तर हुने र दुई सिजन रेलिगेसन भने नहुने बताएका छन् । कोरोना भाइरस (कोभिड–१९) को महामारीको कारण अबको सिजन सुरु हुन नसक्ने भन्दै सिजन समाप्त गर्ने अध्यक्ष तापियाले बताएका थिए । यसबारे एफएले मंगलबार आधिकारिक रुपमा नै घोषणा गर्नेछ ।

अर्जेन्टिनाको शीर्ष डिभिजन भने गत मार्चमै सम्पन्न भइसकेको थियो । तर, सुपर लिगासहित अन्य लिगहरु रद्द गरिएको हो । यस्तै अध्यक्ष तापियाले आउदो दुई सिजन कुनै पनि टोली रेलिगेसनमा नपर्ने थपेका छन् । ‘हाम्रो लक्ष्य खेल पुनः शुरु गर्नु हो । तर, ठुलो सुरक्षाका साथ खेल सुचारु गर्न कठिनाइ हुनेछ,’ अध्यक्ष तापियाले भने । अर्जेन्टिनामा अहिले ३ हजार ८ सय ९२ जनामा कोरोना संक्रमण देखिदा १ सय ९२ जनाले ज्यान गुमाइसकेका छन् ।