एजेन्सी – कोरोना भाइरस संक्रमण महामारीका कारण पछिल्लो केहि सातायता विश्व नै ठप्पजस्तो अवस्थामा छ । यसको असरबाट खेलकुद क्षेत्र पनि अछुतो छैन ।

आर्थिक रुपमा खेलकुदमा निकै असर पर्ने आँकलन गरिएको छ । अझ फुटबलको सिजन सकिने अवस्था नजिकिंदा निम्तिएको यस समस्याले खेलाडीको सम्झौता र सरुवा बजारमा नै प्रत्यक्ष असर पार्नेछ । खेल नै रोकिएपछि क्लबहरुको आम्दानी नहुँदा क्लब संचालन गर्ने रणनीति नै परिणत गर्नुपर्ने अवस्था समेत देखिएको छ ।

खेल नहुँदा क्लबहरुले टिकटबाट उठ्ने रकम पाएका छैनन् । युरोपका लिगमा क्लबहरुको २० प्रतिशतभन्दा बढी आम्दानी टिकटबाट मात्र हुने गर्दछ । त्यसपछि टेलिभिजन प्रसारणले पनि क्लबको आम्दानीमा बलियो भूमिका खेल्छ । खेल नै नहुँदा टिकट र प्रसारणको रकम क्लबहरुले पाएका छैनन् । अझ कतिपय टोलीमा प्रायोजकले समेत रकम उपलब्ध गराउन आनाकानी गरेका छन् ।

आम्दानी नभएको अवस्थामा कति क्लबले खेलाडीको तलब समायोजन गरेका छन् त केहिले तलब नै स्थगित गरेका छन् । अब सिजन सकिएलगत्तै क्लबहरुले खेलाडी फुकुवा गर्ने पनि सम्भावना रहेको छ । त्यसको विकल्पमा खेलाडी अनुबन्धन गर्नका लागि अन्यत्र क्लबसँग खेलाडी साटफेर गर्ने प्रस्ताव पनि हुनेछ ।

विशेषगरि ठूला टोलीहरुले आफ्नो सिनियर टोलीको योजनामा नभएका खेलाडीलाई अब लोनमा पठाउने छन् । त्यसो नभएको खण्डमा आफूले इच्छा गरेको खेलाडी अनुबन्ध गर्न दुई-तीन खेलाडी समेत संलग्न गराएर साटफेरको प्रस्ताव पनि हुन सक्नेछ ।

अर्को विकल्प क्लबहरुले आफ्नो एकडेमीका खेलाडीलाई मौका दिन सक्नेछन् । वैकल्पिक खेलाडीका रुपमा अब टोलीहरुले खेलाडी अनुबन्धन गर्ने सम्भावना कम हुनेछ । यसले क्लबको आर्थिक अवस्था कमजोर हुन नदिन सहयोग गर्नेछ ।