एजेन्सी – नेदरल्यान्ड तथा जर्मन क्लब बायर्न म्युनिखका स्टार विंगर आर्जेन रोबेनले फुटबलमा फर्कने चाहना राखेका छन् । रोवेनले सन्यास लिएको १ वर्षपछि नै फुटबलमा फर्कने संकेत गरेका हुन् । 

३६ वर्षीय रोबेनले सन् २०१९ को सिजन सकिएलगत्तै जुलाईमा सबै खाले फुटबाट सन्यासको घोषणा गरेका थिए । उनले सन्न्यासको सुरुमा फुटबललाई मिस नगरेको र पछिल्लो समयमा मात्रै फुटबल खेल्ने बारे सोच आएको बताए । अझै खेल्न सक्ने क्षमता रहेको एफसी बायर्न पोडकास्टलाई अन्तर्वार्तामा भनेका छन् ।

‘यहाँ एक चरण थियो । मलाई यस्तै खेल्ने विचार आयो । हुनसक्छ म फेरि खेल्न चहान्छु । समय समयमा मलाई यस्तै भावना आउछ । यो सबैको लागि ज्यादै अनौठो र कठिन समय हो,’ रोबेनले भने, ‘म पनि एक फुटबल खेलाडी हुँ । अहिले विश्व नै कोरोना भाइरसको मारमा छ । फुटबल सुचारु भएपछि म पनि पुनः फुटबलमा फर्कन सक्नेछु । कुन क्लबबाट भन्ने अहिले नै भन्न सकिने अवस्था छैन ।’

सन्न्यास लिनुअघिको सिजनमा चोटसँग जुधिरहेका कारण उनले लामो समय मैदानमा बिताउने मौका पाएका थिएनन् । त्यसकारण पनि उनी पुनः फुटबलमा फर्किएपनि नियमित रुपमा खेल्ने सम्भावना भने न्युन रहेको छ । रोबेन तीव्र गतिमा कुद्दै विपक्षीलाई छलाउन र गोल गर्न माहिर मानिन्छन् ।

रोबेनले बायर्नमा झन्डै १० वर्ष बिताउँदा ३०९ खेलमा १४४ गोल गर्नुका साथै १०१ असिस्ट दिएका छन् । उनले सन् २००९ देखि २०१९ मा बायर्नमा रहँदा एक च्याम्पियन्स लिगसँगै ८ जर्मन बुन्डेस लिगा र ५ पटक जर्मन कपको उपाधि जितेका थिए । रोबेनले डच क्लब ग्रोनिङइनबाट व्यवसायिक खेल करियर शुरु गरेका थिए । उनले ग्रोनिङइनमा २००२ देखि २००२ सम्म खेले । त्यसपछि उनले पीएसभीमा २००४ सम्म खेल्दै इंग्लिस क्लब चेल्सीमा पुगेका थिए ।

सन् २००४ देखि २००७ मा चेल्सीमा बिताएका रोवेनले २००९ सम्म स्पेनिस क्लब रियल म्याड्रिडमा बिताएका थिए । त्यसपछि उनले लामो समय जर्मन क्लब बायर्नमा बिताएका थिए । उनले नेदरल्यान्डबाट ९६ खेलमा ३७ अन्तर्राष्ट्रिय गोल गरेका छन् । रोबेनले २०१७ मै अन्तर्राष्ट्रिय फुटबलबाट सन्न्यासको घोषणा गरेका थिए ।