एजेन्सी – फिफा विश्वकप २०१४ अन्तर्गत अर्जेन्टिनाविरुद्ध फाइनलमा जर्मनीका स्टार मारियो गोट्जेले अतिरिक्त समयमा गोल गर्दै अर्जेन्टिनीहरुलाई निराश पारेका थिए ।

बेन्चबाट गएर १ सय १३ औं मिनेटमा भलमार्फत गोट्जेले गोल गरेपछि लियोनल मेस्सीको कप्तानीमा रहेको अर्जेन्टिनालाई १–० ले हराउँदै जर्मनीले विश्वकप उपाधि जितेको थियो । गोट्जे जो फाइनलको नायक बनेका थिए, उनको आदर्श खेलाडी मेस्सी थिए भन्ने कमैले अनुमान गरेका थिए । उनको गोलको केहि समय पछि जर्मनी टोलीले विश्व कप उपाधि उचालेको थियो । जर्मनीले विश्व कप जितेको त्यो चौथो पटक थियो ।

फाइनलपछि २२ वर्षे गोट्लेले आफू मेडलसहित अर्जेन्टिनी कप्तान मेस्सीसँगको उभिएको फोटो समाजिक सञ्जालमा हाल्दै लेखे ‘जिनियस‘ अर्थात् प्रतिभावान । त्यो फोटोको विषयमा स्मरण गर्दै गोट्जेले अन्तवार्तामा भनेका छन्, ‘इमान्दार भएर भन्दा म कन्फ्रेन्स रुममा थिए । मैले म्यान अफ दी म्याच अवार्ड जितेको थिए । त्यति बेला मैले मेस्सीलाई पछाडि देखें । म उनी भएको ठाँउमा कुद्दै गए । त्यसपछि मैले उनलाई फोटो खिच्नको लागि आग्रह गरें ।’

विश्वकप फाइनल हार्दाको निरासहाजनक क्षणमा पनि मेस्सीले सहजता पूर्वक लिएकोमा गोट्जे प्रभावित भएको सुनाए । उनले भने,’मेस्सी साच्चै राम्रो व्यवहारका छन् ।’ मेस्सी प्रतियोगिताको उत्कृष्ट खेलाडी घोषित हुँदै गोल्डेन बल जित्न सफल भएका थिए ।