एजेन्सी– कोरोना भाइरस कोभिड १९ को अत्यन्तै प्रभावित मुलुकहरुमा इटाली एक हो । जसका कारण इटाली लामो समयदेखि लकडाउन लागु छ । कोरोनाकै कारण इटालियन सिरिए लगायत सबै खेल गतिविधि ठप्प छन् ।

अब विस्तारै भने इटालीमा लकडाउन खुकुलो हुने अवस्था सृजना भएको बताइएको छ । इटालीका प्रधानमन्त्री जिसेपे कोन्टले लकडाउन केहि सहज हुने घोषणा गरेका थिए । उनले मे ४ बाट लागु हुने गरि लकडाउनलाई सहज बनाउन लागिएको बताएका हुन् ।

‘उनले क्लबहरुले मे १८ बाट प्रशिक्षण सुरु गर्न सक्ने उल्लेख गरेका छन् । मलाई फुटबल मन पर्छ । सिरिए सुरु हुनेपर्छ भन्नेमा हामी छौं’, उनले भने, ‘पहिला प्रशिक्षण सुरु हुनेछ । त्यसपछि परिस्थिति हेरेर प्रतिस्पर्धा सुरु गर्न सकिन्छ ।’

युभेन्टसका केहि खेलाडीमा कोरोना संक्रमण देखिएपछि लिग बन्द गरिएको थियो । ड्यानिएल रुगानी, पाउलो डिबाला र ब्लेस मातुइडी सबै ठिक भएका छन् । साम्पडोरियाका केहि खेलाडी पनि संक्रमित भएका थिए ।

आइतबार कोरोनाका कारण इटालीमा २ सय ६० जनाको मृत्यु भएको थियो । मार्च यता मृत्यु हुनेको त्यो सबै भन्दा कम संख्या हो । इटालीमा झन्डै २ लाख संक्रमित छन् भने २६ हजार भन्दा बढीको मृत्यु भएको थियो ।