एजेन्सी – इटालियन च्याम्पियन युभेन्टसका अर्जेन्टिनी फरवार्ड गोन्जालो हिगुआइन निकै कठिन परिस्थितिमा छन् । हाल अर्जेन्टिनामा रहेका उनी इटाली नफर्केको खण्डमा सम्झौता रद्द हुने सम्भावना रहेको छ ।

हिगुआइन कोरोनाको कहर सुरु हुनेबेला नै अर्जेन्टिना फर्केका थिए । तर अहिले उनी फर्कने वा नफर्कने भन्ने प्रष्ट नहुँदा युभेन्टसले उनको सम्झौता रद्द गर्ने सम्भावना पनि देखेको छ । हिगुआइन आफ्नो आमा न्यान्सी जाकारियास बिरामी भएकाले उनी सँगै अर्जेन्टिनामा रहन चाहन्छन् ।

हिगुआइन क्लबसँग छलफल नगरी नै अर्जेन्टिनामै बसेका छन् । क्लबले पनि प्रशिक्षण सुरु नहुँदा कुनै समस्या नरहेको बताएको छ । तर अब केहि दिनमा नै इटालीमा क्लबहरुले प्रशिक्षण सुरु गर्ने तयारी गरिरहँदा हिगुआइनको अवस्था भने प्रष्ट हुन सकेको छैन ।

हिगुआइनसँग अब तीन विकल्प रहेको छ । एउटा सिजन समाप्त गर्न केहि समयको लागि इटाली फर्कने, अथवा युभेन्टससँग छलफल गरेर अर्जेन्टिनामै बस्ने वा क्लबसँग सम्पर्क नगरी अर्जेन्टिना बस्ने र सम्झौता रद्द भएको अवस्था निम्त्याउने । हिगुआइनलाई क्लबले यस सिजनको अन्तिममा बेच्ने तयारी गरेपनि उनको सम्झौता अर्को सिजन सकिँदैछ ।

हिगुआइन पछिल्लो एक महिनायता अर्जेन्टिनामै छन् । क्लबका दुई खेलाडीमा कोरोना देखिएपछि उनी स्वदेश फर्केका थिए । उनी फर्कने क्रममा प्रहरीले उनलाई रोकेपनि परिक्षण नेगेटिभ भएको प्रमाणपत्र देखाएपछि उनी व्यक्तिगत जहाजमा फर्केका थिए । युभेन्टसले उनलाई अर्जेन्टिना जान स्वीकृति दिएपनि हाल फर्कने विषयमा कुनै छलफल हुन सकेको छैन ।