एजेन्सी – इंग्लिस क्लब म्यानचेस्टर युनाइटेडले जर्मन क्लब बोरुसिया डर्टमन्ड तथा इंग्ल्यान्डका युवा स्टार जाडोन सान्चो अनुबन्ध गर्नको लागि दुई खेलाडी बेच्ने योजना अघि सारेको छ ।

युनाइटेडले सान्चोका लागि फ्रान्सेली मिडफिल्डर पल पोग्बा र इंग्लिस जेसे लिंगार्डलाई आउदो समर ट्रान्सफरमा बिक्री गर्ने योजना अघि सारेको हो । म्यानचेस्टर युनाइटेडका प्रमुख इड उडवार्डले आफ्ना म्यानेजरसँग खेलाडी खरिदका लागि खेलाडी बेचेरै रकम जम्मा गर्न निर्देशन दिएपछि युनाइटेडले सान्चोलाई भित्र्याउन रकम उठाउने प्रयासमा छ ।

त्यसैले दुई खेलाडीलाई बिक्री गर्ने योजना अघि सारेको दि सन पत्रिकामा उल्लेख छ । पोग्बा र क्लबको सम्बन्ध पछिल्लो समय खराब रहेको छ । उनी लामो समयदेखि मैदान बाहिर छन् । प्रशिक्षक सोल्सजरले उनलाई आफ्नो योजनामा नराख्ने भएका छन् ।

सान्चोको मुल्य एक सय मिलियन पाउण्ड राखिएको छ । उनले यो सिजन डर्टमन्डका लागि ३५ खेलमा १७ गोल गर्नुका साथै १९ असिस्ट दिएका छन् । डर्टमन्डमा सान्चोको सम्झौता २०२२ को समरसम्म रहेको छ । म्यानचेस्टर सिटीमा हुर्किएका सान्चो २०१७ मा डर्टमन्ड पुगेका थिए । त्यहाँ उनले लगातार उच्च प्रदर्शन गरिरहेका छन् । सान्चो अनुबन्ध गर्न अन्य क्लबहरुले पनि चासो दिइरहेका छन् ।

रकम जम्मा गर्नको लागि युनाइटेडले मार्काेस रोजो, क्रिस स्मलिङ, एन्ड्रियस पेरेरालाई पनि रिलिज गर्न सक्नेछ । लिंगार्डले प्रशिक्षक ओले गनर सोल्सायरको मन जित्न सकेका छैनन् । युनाइटेडका मिडफिल्डर पोग्बा खरिदका लागि युभेन्टस इच्छुक देखिएको छ । उसले पोग्बा भित्र्याउन आरोन राम्से, मिरालिम प्यानिच र एड्रियन रबियोटलाई बेच्ने योजना अघि सारेको छ ।