एजेन्सी – इंग्ल्यान्ड र म्यानचेस्टर सिटीका स्टार रहिम स्टर्लिङलाई जर्सी संकलनको सौख छ । तर, अहिले सम्म उनले चाहेको एउटा जर्सी भने पाउन सकेका छैनन् ।

बार्सिलोनाका सुपर स्टार लियोनल मेस्सीको जर्सीका लागि भने उनी निकै आतुर रहेका छन् । उनले भने, ‘म एउटा त्यस्तो जर्सीको पर्खामा छु त्यो भनेको मेस्सीको जर्सी हो ।’ २५ वर्षे फरवार्डले भने उनको घरमा दुई वटा कोठामध्ये एउटा ट्रफी र अर्को कोठामा जर्सी राख्ने उनको योजना रहेको छ । जहाँ उनले खेल जीवनमा प्राप्त गरेको ट्रफी र संकलन गरिएका जर्सी सजाइनेछ ।

अब स्टर्लिङले चाहेको एउटा मात्र जर्सी हुने वित्तिकै उनले त्यसलाई सबै भन्दा उत्कृष्ट संकलन मान्नेछन् । ‘मेरा लागि अब एउटा मात्र संकलन गर्न बाँकी भनेको मेस्सीको जर्सी हो। जति बेला हामीले बार्सिलोनासँग खेलेका थियौं त्यो बला नेयमारको सर्ट पाए । मैले पहिलो पटक मागेको जर्सी त्यहि हो’, उनले भने, ‘जहिले म आफ्नो जीवनबाट विश्राम लिनेछु र कतै बस्नेछु । आशा छ त्यहाँ मैले संकलन गरेका जर्सी र ट्रफी हुनेछन् ।’

कोरोना भाइरसका कारण अहिले प्रिमियर लिगसहित युरोपका सबै फुटबल गतिविधि स्थगित छन् । स्टर्लिङ अहिले इप्रिमियर लिग इन्भिटेसनल फिफा २० टुर्नामेन्टमा सिटीका तर्फबाट प्रतिनिधित्व गरिरहेका छन् । उनले प्रिमियर लिगमा सिटीका लागि ११ गोल तथा च्याम्पियन्स लिगमा ५ गोल गरेका छन् ।