एजेन्सी – इटालियन च्याम्पियन युभेन्टसले हाल पीएसजीमा खेलिरहेका अर्जेन्टिनी फरवार्ड माउरो इकार्डीलाई टुरीन ल्याउने प्रयास गर्ने भएको छ ।

इकार्डीको भविष्य पीएसजीमा सुनिश्चित नदेखिएपछि उनकी एजेन्ट तथा श्रीमती वान्डा नाराले इटालीमा नै क्लब खोज्ने बताएकी थिइन् । गत सिजनको सुरुवातमा नै युभेन्टसले इकार्डीलाई विकल्पको रुपमा राखेको थियो । तर यस सिजन गोन्जालो हिगुआइन क्लब छाड्ने भएसँगै अब इकार्डीको सम्भावना बलियो देखिएको हो । हिगुआइनको यस सिजन प्रदर्शन खस्किएको कारण पनि उनको विकल्प खोजिएको हो ।

इकार्डी इन्टर मिलानबाट लोनमा पीएसजी पुगेका हुन् । इन्टरको प्रशिक्षक एन्टोनियो कोन्टे र व्यवस्थापनसँग खटपट परेपछि उनलाई टोलीमा राखिएको थिएन । अब इन्टर उनलाई स्थायी रुपमा नै अन्यत्र पठाउने तरखरमा छ । इन्टरले उनको स्थानमा रोमेलु लुकाकुलाई मोटो रकममा खरिद गरिसकेको छ ।

युभेन्टसले भने इकार्डीलाई भित्र्याउन ट्रान्सफर रकमसँगै ३१ वर्षीय मिडफिल्डर जुआन क्वाडराडोलाई इन्टर पठाउने प्रयास गर्नेछ । इन्टरलाई हाल राइट विंग पोजिसनमा खेलाडी चाहिएको र कोरोनाका कारण आर्थिक अवस्था नाजुक बनेपछि खेलाडी अनुबन्धनमा एक अर्कासँग साटफेर गर्ने विकल्प क्लबसँग रहनेछ ।

इकार्डीले जारि सिजन पीएसजीका लागि ३१ खेलमा २० गोल गरेका छन् । यसअघि बार्सिलोनाले इकार्डीमाथि नजर राखेपनि अर्का अर्जेन्टिनी फरवार्ड लौटारो मार्टिनेजले प्रभाव जमाएपछि बार्साले उनलाई विकल्पको रुपमा अगाडी सारेको छ ।