एजेन्सी – नेदरल्यान्ड्सको फुटबल संघले शीर्ष डिभिजन लिग एरिडेभिजे रद्द गर्ने निर्णय गरेको छ । लिगको अन्तिम ९ चरणको खेल बाँकी रहँदा उपाधि विजेता निर्क्यौल नगरी लिग रद्द गरिएको हो ।

राष्ट्रिय सरकारले सेप्टेम्बर १ सम्म खेलकुदका सम्पूर्ण कार्यक्रमहरु नगर्न निर्देशन दिएपछि नेदरल्यान्ड्सले लिग रद्द गर्नुको विकल्प नरहेको बताएको छ । यसपटक लिग फुटबलमा कुनै टोली पनि बढुवा घटुवा नहुने स्पष्ट पारेको छ । लिग उपाधि पनि कसैले नजित्ने भएका छन् ।

लिगको शीर्ष स्थानमा रहेको आयाक्स र एजे आल्कमार समान अंकमा रहेका थिए । गोलअन्तरको आधारमा आयाक्स अगाडी रहेपनि संघले उपाधि हस्तान्तरण नगर्ने निर्णय गरेको हो । दोस्रो श्रेणीमा बढुवा हुने लगभग पक्का भएको क्याम्बरले अर्को सिजन दोस्रो श्रेणीमा नै खेल्नुपर्ने भएको छ । क्याम्बर ११ अंक अग्रतासहित शीर्षस्थानमा रहेको थियो ।

संघले यस विकराल परिस्थितिमा गरिएको निर्णयले केहि पक्षलाई समस्या पर्ने बताउँदै उचित विकल्प रोजिएको बताएको छ । सन् १९५६ देखि सुरु भएको लिगमा पहिलो पटक उपाधि जित्ने टोलीको छिनोफानो लाग्न सकेन । अब आयाक्स र आल्कमार दुवै च्याम्पियन्स लिग छनोटमा सहभागी हुनेछन् । तेस्रो स्थानको फेयेनुर्ड युरोप लिगको समूह चरण तथा पीएसभी र विलेमले छनोट चरण खेल्नेछन् ।