एजेन्सी – क्याटलान क्लब बार्सिलोनाले यसै सिजन इंग्लिस क्लब टोटेनहम आइपुगेका मिडफिल्डर टान्गी एनडोम्बेलेलाई अनुबन्ध गर्न लन्डन क्लबसमक्ष खेलाडी साटफेर सहितको प्रस्ताव राख्ने तयारी गरेको छ ।

बार्सिलोनाले मिडफिल्डमा कमजोर स्थितिलाई सुल्झाउन फ्रान्सको राष्ट्रिय टोलीबाट खेलिरहेका मिडफिल्डरलाई अनुबन्धन गर्न खोजेको हो । एनडोम्बेले यसै सिजन टोटेनहम आएपनि प्रशिक्षक माउरिसियो पोचेटिनोले छोडेपछि जम्न सकेका छैनन् । प्रशिक्षक जोसे मोउरिन्होले उनले खेलमा धेरै मिहिनेत नगरेको भन्दै आलोचना समेत गरेका थिए ।

चोटका कारण केहि समस्यामा परेका उनले जारि सिजन २९ मध्य १२ खेलमा मात्र सुरुवात गरेका छन् । बार्सिलोनाले एनडोम्बेलेका लागि फ्रान्सेली डिफेन्डर स्यामुएल उम्टिटी र पोर्चुगिज डिफेन्डर नेल्सन सेमेडोलाई इंग्लिस क्लब पठाउने तयारी गरेको छ । दुवै खेलाडी पछिल्लो समय पहिलो रोजाईमा पर्न संघर्ष गरिरहेका छन् ।

टोटेनहमलाई पनि यहि दुई पोजिसनका खेलाडी आवश्यकता परेको कारण सम्झौताबारे छलफल हुने अपेक्षा गरिएको छ । त्यसो त कोरोना संक्रमणका कारण आर्थिक अवस्था कमजोर हुँदा आउने ट्रान्सफर विन्डोमा खेलाडी साटफेर धेरै हुने आँकलन गरिएको छ ।

यस्तो अवस्थामा यो ट्रान्सफर दुवै पक्षका लागि फलदायी हुने देखिन्छ । मोउरिन्होले एनडोम्बेले आफ्नो योजना भए नभएको प्रष्ट पारेपछि क्लबहरुबीच छलफल हुने बुझिएको छ ।