एजेन्सी – इंग्लिस प्रिमियर लिग क्लब वाटफर्डले स्पेनिस ब्रान्ड केल्मीको खेल सामग्री प्रयोग गर्ने भएको छ । हाल एडीडासको सामाग्री प्रयोग गरिरहेको वाटफर्डले सम्झौता सकिएपछि नविकरण नगर्ने निर्णय गरेको हो ।

एडीडासले भन्दा बढी रकम दिएकाले पनि केल्मीसँग सम्झौता सम्भव भएको हो । दुई पक्षबीच सम्झौता हस्ताक्षर भएपनि हाल औपचारिक रुपमा सार्वजनिक गरिएको छैन । वाटफर्डले यो सिजन लिगको शीर्षस्थानमा रहेको लिभरपुललाई पराजित गर्दै मर्सीसाइड क्लबको अपराजित यात्रामा पूर्णविराम लगाएको थियो । वाटफर्ड लिग तालिकामा २७ अंकसहित गोल अन्तरको आधारमा १७ औं स्थानमा छ ।

वाटफर्डका इटालियन मालिक जिनो पोज्जो आफ्नो पिता जियामपाउलो पोज्जोको क्लब उडीनेजेमा पनि सल्लाहकार रहेका छन् । दुई क्लबबीच पछिल्लो समय खेलाडी किनबेचमा पनि सहकार्य हुँदै आएको छ । यसअघि पोज्जो परिवारले स्पेनिस क्लब ग्रानडा किनेपनि केहि वर्षमै बेचेको थियो । वाटफर्डले अर्को सिजन केल्मीको किटमा खेल्नेछ ।

पछिल्लो समय नेपालमा समेत निकै लोकप्रिय रहेको ब्रान्ड केल्मीले युरोपेली फुटबलमा पनि विभिन्न टोलीहरुसँग सहकार्य गर्ने कार्यलाई थप बढावा दिएको छ । हाल स्पेनमा रहेका थुप्रै क्लबहरुले केल्मीको जर्सी प्रयोग गर्दै आएका छन् । नेपालमा पनि अधिकांश ए डिभिजन क्लबले केल्मीकै जर्सी प्रयोग गर्दै आएका छन् । नेपालको राष्ट्रिय फुटबल टोलीहरु, करांते टोली, तेक्वान्दो टोली लगायत अन्य थुप्रै खेलमा पनि केल्मी लोकप्रिय रहँदै आएको छ ।