एजेन्सी – रियल म्याड्रिडका पूर्व खेलाडी तथा ब्राजिलियन डिफेन्डर रोबर्टो कार्लोसले इटालियन क्लब इन्टर मिलान छाडेर रियल म्याड्रिड आउने निर्णय गर्न १० मिनेट मात्र लागेको बताएका छन् ।

कार्लोसले इन्टर मिलानमा एक सिजन खेलेपछि सन् १९९६ को ट्रान्सफर विन्डोमा सान्टियागो बर्नाबाउ आएका थिए । उनले रियलमा लामो समय खेल्दै आफूलाई विश्वकै उत्कृष्ट लेफ्ट ब्याकको रुपमा स्थापित गरे । कार्लोस फिफाको इन्स्टाग्राम लाइभमा बोल्दै इन्टरमा आफूले चाहेको पोजिसनमा खेल्न नपाएको गुनासो पोखे ।

‘इन्टर मिलानमा मलाई कहिले विंगर त कहिले फरवार्डकै भूमिकामा पनि खेलाइयो । समस्या त त्यहाँ आयो जब मैले सुरुवाती ७ खेलमा ७ गोल गरें । मलाई आक्रमणमा खेलाएको कारण निकै समस्या भयो,’ उनले भने ।

‘मेरो लागि गोल गर्नु महत्त्वपूर्ण थिएन । अर्को वर्ष कोपा अमेरिकामा ब्राजिलको टोलीमा पर्न मैले लेफ्ट ब्याक भूमिकामै खेल्नु थियो । मैले अध्यक्ष मासिमो मोराटीलाई नै भन्नुपर्यो,’ कार्लोसले थपे, ‘संयोगवश त्यहि दिन रियल म्याड्रिडका अध्यक्ष लोरेन्जो सान्जसँग छलफल थियो र मैले १० मिनेटमा नै आफू रियल जान तयार रहेको निर्णय सुनाएँ ।’

कार्लोस डिफेन्डर भएपनि शक्तिशाली प्रहार गर्न र फ्रिकिकमा गोल गर्न माहिर थिए । उनले आफ्नो दुई उत्कृष्ट फ्रिकिक गोलमा बार्सिलोना विरुद्ध गरेको गोल र फ्रान्सविरुद्ध पेरिसमा गरेको गोललाई छाने । आफ्नो करीआरदौरान सबैभन्दा कठिन विपक्षी खेलाडीको रुपमा उनले पोर्चुगलका लुइस फिगो, क्यामरुनका स्यामुएल एटो र स्पेनका ह्वाकिन सान्चेज रहेको बताए ।