एजेन्सी – इंग्लिस क्लब म्यानचेस्टर सिटीले पेरुको क्लब अलियान्जा लिमाबाट १६ वर्षका डिफेन्डर र क्लाइवार्थ अगुइलारसँग सम्झौता गरेको छ ।

पेरु फुटबलले निकै आशा गरिएका प्रतिभा अगुइलारलाई म्यानचेस्टर सिटीले कलिलो उमेरमा नै खरिद गर्ने सम्झौता गरेको हो । खेलाडीले व्यावसायिक सम्झौता गर्न १८ वर्ष पुग्नुपर्ने नियम रहेका कारण उनी त्यसबेला सम्म अलियान्जाबाट नै खेल्ने छन् ।

अगुइलार २०२१ मे महिनामा १८ वर्ष पुगेपछि मात्र सिटीको जर्सीमा देखिने छन् । बेलायतमा १८ वर्ष मुनिकाले व्यावसायिक रुपमा काम गर्न नपाउने नियम रहेकाले विदेशी खेलाडीको हकमा वर्क परमिट पाउन सकिन्न । उनले अब दुई वर्ष पेरुमै रहेर खेल्नेछन् ।

अगुइलारले १५ वर्षको उमेरमा नै दक्षिण अमेरिकी यू-१७ च्याम्पियनसिप खेलेका थिए । उनले उक्त प्रतियोगितामा प्रभाव जमाएपछि सिनियर राष्ट्रिय टोलीबाट समेत खेल्ने अवसर पाएका थिए । अगुइलारलाई पेरु फुटबलले पाएको हालसम्मकै उज्ज्वल प्रतिभा बन्न सक्ने आँकलन गरिएको छ ।

अगुइलारको क्लब आलियान्जाले यस ट्रान्सफरलाई पेरु फुटबलबाट युरोप गएको सबैभन्दा ठूलो ट्रान्सफर रहेको बताएको छ । अगुइलारले पनि आफ्नो लक्ष्य सिटीको पहिलो रोजाईमा परेर खेल्ने रहेको बताए । आलियान्जाले हालसम्म पेरुको शीर्ष लिग २३ पटक जितेको छ भने २२ पटक उपविजेता बनेको छ ।