एजेन्सी – बेल्जियमको राष्ट्रिय टोली तथा स्पेनिस महारथी रियल म्याड्रिडका गोलरक्षक थिबाउट कोर्टुवाले आफू स्पेनका दिग्गज गोलरक्षक इकार कासिलासकै कारण गोलरक्षक बनेको बताएका छन् ।

यसअघि एटलेटिको म्याड्रिडमा समेत खेलेका कोर्टुवाले युवा अवस्थामा हुँदा कासिलासकै खेल हेरेर गोलरक्षक बन्न प्रेरित भएको बताए । ‘ जब कसिलासले रियल म्याड्रिडमा खेल्थे म उनको खेलबाट प्रभावित भएँ । उनकै खेल हेरेर मलाई गोलरक्षक बन्न मन लागेको थियो । उनको खेल हेरेर नै मलाई रियल म्याड्रिड पनि मनपर्न थालेको थियो,’ कोर्टुवाले भने ।

कोर्टुवाले गोलरक्षक बन्न थालेपछि भने नेदरल्यान्ड्सका एडविन भान डर सारको खेलले पनि प्रभावित भएको बताए । ‘जब म १४ वर्षको पुगें, मैले भान डर सारको खेल देखें । उनको र मेरो शारीरिक बनोट उस्तै भएकाले पनि उनको खेलप्रति आकर्षण बढ्यो,’ उनले थपे ।

कोर्टुवाले गोलरक्षणकै चर्चा गर्दा बार्सिलोनाका मुख्य गोलरक्षक मार्क आन्दर टेर स्टेगनको समेत प्रशंसा गरे । ‘ टेर स्टेगन राम्रा गोलरक्षक हुन् । उनको बल खुट्टामा हुँदा फुटवर्क पनि राम्रो छ । उनले वन भर्सेस वनमा पनि खुट्टाको राम्रो सदुपयोग गर्छन् । उनको प्रहार ब्लक गर्ने क्षमता पनि राम्रो छ, एटलेटिकोका ओब्लाकको जस्तै,’ उनले थपे ।

कोर्टुवाले लकडाउनको यस परिस्थिति सकिएपछि पहिलो कार्य प्रशिक्षण गर्न मन लागेको बताए । ‘ यो अवस्था सकिएपछि पहिलो कार्य भने ट्रेनिङ ग्राउन्ड पुगेर प्रशिक्षण गर्नु हुनेछ । म सरकारको घोषणाको प्रतिक्षामा छु । हामीले अहिले आफ्नो स्वास्थ्यलाई ध्यानमा राख्नुपर्छ र उचित समयको प्रतिक्षा गर्नु जरुरि छ,’ उनले टुंग्याए ।