एजेन्सी – रियल म्याड्रिडबाट लोनमा रियल सोसीडाड पुगेका मिडफिल्डर मार्टिन ओडेगार्ड लगातार उत्कृष्ट प्रदर्शन गरिरहेका छन् । उनी अर्को सिजन रियल म्याड्रिड फर्कनेमा दुइमत छैन । उनले आफूसँगै अर्को सिजन रियलमा आफ्नै राष्ट्रका सहकर्मी एर्लीङ हालान्डलाई पनि ल्याउने प्रयास गरिरहेका छन् ।

रियल म्याड्रिडले लामो समयदेखि आक्रामक खेलाडीको परिपूर्ति गर्न सकेको छैन । यसै विन्टर ट्रान्सफरमा साल्ज्बर्गबाट बोरुसिया डर्टमुन्ड आएका नर्वेली युवा स्टार हालान्डले उत्कृष्ट प्रदर्शन गरिरहेका छन् । रियलले मोटो रकम खर्चेर भएपनि हालान्डलाई टोलीमा समेट्ने प्रयास गर्ने बुझिएको छ । कोरोनाले गर्दा आर्थिक अवस्थामा प्रभाव परेपनि रियलले आफ्नो आक्रमण सुधार्न हालान्ड अनुबन्ध गर्ने मुख्य योजना बनाएको छ ।

स्पेनिस पत्रिका एएसका अनुसार रियलका अध्यक्ष फलोरेन्टिनो पेरेजले आफ्ना नजिकका साथी तथा डर्टमुन्डका प्रमुख अधिकृत हान्स-जोआकिम वात्ज्केसँग यसबारे छलफल सुरु गरेका छन् । अर्कोतर्फ हालान्डका एजेन्ट मिनो रायोलाले पनि उनलाई रियल म्याड्रिड नै लान खोजेका छन् । रायोला विश्वका प्रख्यात एजेन्टमा गनिन्छन् । उनको रियल म्याड्रिडसँग राम्रो सम्बन्ध रहेको छ ।

डर्टमुन्डले हालान्डलाई लामो समय क्लबमा राख्न नसक्ने बुझेका कारण पनि रियलको प्रस्ताव स्वीकार्ने सम्भावना छ । हाल रियलबाट नै लोनमा रहेका डिफेन्डर अक्रफ हाकिमीलाई डर्टमुन्डमै राख्न पनि क्लब प्रयासरत छ । हालान्डलाई डर्टमुन्डले बेच्ने निर्णय लिएमा हाकिमी पनि उक्त प्रस्तावमा सामेल हुने सम्भावना छ ।

यता ओडेगार्डले सोसीडाडमा यस सिजन आफ्नो लयलाई निरन्तरता दिइरहेका छन् । उनी अर्को सिजन रियलको मुख्य टोलीमा खेल्ने लगभग पक्का छ । ओडेगार्डले आफ्ना सहकर्मीसँग रियल आउने विषयमा छलफल गरिरहेको बुझिएको छ । हालान्डले चाहेमा रियलमा उनको अनुबन्धन कठिन देखिन्न ।

हालान्डले जनवरीमा डेब्यु गरेदेखि जर्मन टोलीका लागि ११ खेलमा १२ गोल गरिसकेका छन् । हालान्डको सम्झौतामा अर्को समर ट्रान्सफरमा ६३ मिलियनमा क्लबले छाड्नुपर्ने प्रावधान रहेको छ । जसले गर्दा डर्टमुन्डले उचित प्रस्ताव आएमा उनलाई अन्यत्र पठाउन सक्छ ।