एजेन्सी – क्याटलान क्लब बार्सिलोनाका प्रशिक्षक किके सेटिनले अर्को सिजनको सुरुवातमा बार्सिलोनाले हाल लोनमा बायर्न म्युनिख पुगेका ब्राजिलियन मिडफिल्डर फिलिपे कोउटिन्होको प्रतिक्षा गर्ने बताएका छन् ।

स्पेनिस रेडियो आरएसी१ सँगको अन्तर्वार्ताका क्रममा सेटिनले आफूलाई कोउटिन्होको खेल्ने शैली मन पर्ने र उनलाई योजनामा समेट्ने बताएका हुन् । ‘मलाई कोउटिन्हो मनपर्ने खेलाडी हुन् । उनी उत्कृष्ट खेलाडी हुन् र बार्सिलोनाका खेलाडी पनि । बायर्नले उनलाई राख्न चाहेमा मोटो रकम तिर्नुपर्ने हुन्छ तर उनी आफैं बार्सिलोना फर्कन इच्छुक छन् ।’

‘म अर्को सिजनको सुरुवातमा उनको प्रतिक्षा गर्नेछु । मैले यसबारे उनीसँग कुरा गरेको छैन । यदि आवश्यक पर्छ भने अवश्य गर्नेछु,’ सेटिनले थपे ।

कोउटिन्हो बार्सिलोनाको टोलीमा अपेक्षित प्रदर्शन गर्न नसक्दा सिजनको सुरुवातमै बायर्न म्युनिख पुगेका थिए । लोनमा बायर्न पुगेका उनलाई क्लबमा राख्न १ सय २० मिलियन युरो तिर्नुपर्ने हुन्छ । बायर्नले उनलाई नराख्ने संकेत पनि दिइसकेको छ । यद्यपि उनलाई अनुबन्ध गर्न इंग्लिस क्लब चेल्सी र आर्सनलले भने इच्छा देखाएका छन् ।

प्रशिक्षक सेटिनको आगमनले कोउटिन्होलाई बार्सिलोनामा पुन: अर्को अवसर मिल्ने देखिएको छ । लिभरपुलमा रहँदा निकै प्रभावशाली प्रदर्शन गरेका उनले बार्सामा भने केहि फिक्का देखिएका थिए । बार्सिलोनामा फर्केपछि पुन: आउने अवसरलाई उनले सदुपयोग गर्न नसके अन्यत्र भविष्य खोज्नुपर्ने भने पक्का जस्तै छ ।