एजेन्सी – बेल्जियन राष्ट्रिय टोली तथा इंग्लिस क्लब म्यानचेस्टर युनाइटेडका पूर्व खेलाडी मारोउने फेलाइनी कोरोना भाइरस (कोभिड–१९) को संक्रमणबाट मुक्त भएका छन् । 

कोरोना संक्रमण हुने पहिलो चिनिया सुपर लिग (सिएसएल) खेलाडी बनेका फेलाइनी २१ दिन पछि कोरोनाबाट मुक्त भएको अस्पतालले पुष्टि गरेको छ । उनकोे जिना शहरस्थित एक अस्पतालमा उपचार भएको थियो । उनी कोरोनाबाट मुक्त भएपनि थप निगरानीका लागि १४ दिन क्वारेन्टाइनमा बस्नेछन् ।

फेलाइनीले इन्स्टाग्राममा आफ्नो कोठामा व्यायाम गर्दै गरेको भिडियो पोस्ट गरेका छन् । ‘फेलाइनीको मुल्याङ्कन गरियो । उनी अहिले पुर्ण रुपमा स्वास्थ्य देखिएका छन् । उनमा अहिले कोरोनाको कुनै संक्रमण देखिएन । उनी पुर्ण रुपमा निको भएका छन् ,’ अस्पतालले जारी गरेको विज्ञप्तिमा उल्लेख छ ।

चिनिया क्लब सानडोङ लुनिङले गत २२ मार्चमा ३२ वर्षीय फेलाइनीमा कोरोना भाइरसको सकरात्मक लक्षण देखिएको पुष्टि गरेको थियो । चीनबाटै शुरु भएको कोरोना भाइरसको प्रकोप अहिले विश्वभर फैलिरहेपनि चिनिया खेलाडीहरुमा यसको संक्रमण देखिएको थिएन । चीन बाहिर अन्य खेलाडीहरुमा भने कोरोना संक्रमण देखिएको थियो ।

कोरोना भाइरसको संक्रमण हुन त्रासले सिएसएल खेलाडील चीन छाडेका थिए । अहिले चीनको कोरोना सामान्य बन्दै गएपछि खेलाडीहरु स्वदेश फर्कने क्रम बढेको छ । फेलाइनीको टिम सानडोङ लुनिङ पनि केही दुवईमा पुगेको थियो । फेब्रुअरी २० मा उनी बेल्जियम, मोरक्को र माल्दिभ्स हुँदै  चीनमा पुगेका थिए । उनी सिंगापुरबाट सांघाई पुडोङ इन्टरनेसनल एयरपोर्टबाट चीन पुगेपछि परिक्षणको क्रममा उनको संक्रमण पुष्टि भएको हो ।

फेलाइनीले ११ वर्ष इंग्ल्यान्डमा बिताएका थिए । यसक्रममा उनले एभर्टन र म्यानचेस्टर युनाइटेडबाट खेलेका थिए । त्यसपछि उनी २०१९ मा १० मिलियन पाउन्डमा चीनतर्फ लागेका थिए । उनले चिनिया लिगको पहिलो सिजनमा ३४ खेल खेल्दै १२ गोल र ५ असिस्ट दिएका छन् ।