एजेन्सी – प्रशिक्षणमा फर्केने रियल सोसिडाडको घोषणा पछि रियल म्याड्रिडले पनि प्रशिक्षण सुरु गर्ने विषयमा सोचिरहेको बताइएको छ । प्रशिक्षणमा फर्कनका लागि उपयुक्त समयका विषयमा क्लबमा छलफल सुरु भइरहेको जनाइएको छ ।

आफ्ना बास्केटबल खेलाडी टिरे थोम्सकिन्सको कोराना संक्रमण भएपछि रियलले मार्च १२ मा आफ्ना खेलाडीलाई क्वारिन्टिनमा राखेको थियो । रियलले खासमा मार्च २६ सम्मका लागि प्रशिक्षण रोकेको थियो । कोभिड १९ का कारण सरकारले संकटकाल घोषणा गरेपछि सबै बन्द भएको थियो ।

निको मिहिचको नेतृत्वमा रहेको क्लबको मिडिकल टोलीले प्रशिक्षणलाई स्वास्थ्यका हिसाबले कसरी सुरक्षित राख्न सकिन्छ भन्ने विषयमा तयारी गरिरहेको बताइएको छ । म्याड्रिड सहरमै पनि संक्रमणविरुद्धको प्रोटोकल व्यवस्थापनको प्रयास भइरहेको छ । कारण कोभिड १९ बाट अन्त्याधिक प्रभावित देशमा स्पेन पनि पर्दछ ।

स्पेनको राजधानी भएकाले पनि म्याड्रिडमा हुने आगामी कार्यक्रम जनताको सुरक्षाको दृष्टिकोणबाट संवेदनशिल रुपमा हेरिएको छ । सोसिडाडले मंगलबारबाट प्रशिक्षण सुरु गर्ने घोषणा गरिसकेको छ । रियलले अहिले नै अभ्यासमा फर्कने मिति तय गरेको छैन । यद्दपी उनीहरु यो विषयमा गम्भिरतापूर्वक छलफल भने गरिरहेका छन् ।