एजेन्सी – युभेन्ट्सका सुपर स्टार क्रिस्टियानो रोनाल्डोले कोराना भाइरस कोभिड १९ का कारण उत्पन्न कठिन परिस्थितिमा यसविरुद्ध लड्न सबै एकताबद्ध हुनु पर्नेमा जोड दिएका छन् ।

कोरोना भाइरसका कारण युरोपलगायत विश्वका अधिकांश देशका फुटबल गतिविधि ठप्प छन् । सिरिए स्थगित भएपछि रोनाल्डो विरामी आमालाई भेट्न स्वदेश पोर्चुगल फर्केका थिए । अहिले पनि उनी पोर्चुगलमै छन् । पोर्चुगल फुटबल टोलीका कप्तान समेत रहेका रोनाल्डोले पोर्चुगल र इटालीको झन्डा अंकित मास्कको प्रयोग गर्दै सामाजिक सञ्जालमार्फत सन्देश दिएका छन् ।

‘विश्वकै लागि यो कठिन समय हो । त्यसैले हामीले एकताबद्ध हुनुपर्दछ र एकले अर्कालाई सहयोग गर्नुपर्दछ,’ उनले भनेका छन्, ‘हामी जे जति गर्न सक्छौं त्यसका लागि प्रयास गरौं । ’ कारोनाका कारण विश्वभर १ लाख भन्दा बढीको मृत्यु भइसकेको छ भने १५ लाख भन्दा बढी संक्रमित छन् ।

तर, घरमा रहँदा पनि रोनाल्डोले आफुलाई फिट राख्ने प्रयास भने जारी राखेका छन् । रियल म्याड्रिडका पूर्व स्टार ३५ वर्षे रोनाल्डोले टपलेस र आँखा चिम्म गरेको फोटो इन्स्टाग्राममा पोष्ट गरेका थिए । जसमा उनले लेखेका छन्, ‘स्वास बाहिर, स्वास बाहिर । सक्रिय रहौं ।’ जसमा ह्यासट्याग ‘स्टे होम सेभ लाइभ्स’ रहेको छ । केहि दिन अघि उनले आमा अस्पतालबाट फर्केपछि आमा र बिहिनीहरुको साथको फोटो पोष्ट गरेका थिए ।

युभेन्टस इटालियन लिगको शीर्षस्थानमा रहेपनि कोरोनाका कारण लिग स्थगित भएपछि हाल टोली विश्राममा छ । अब लिग पुन: सुचारु हुने नहुने अन्यौल रहेको अवस्थामा क्लबहरुले प्रशिक्षण सुचारु गर्न सकेका छैनन् । सबै खेलाडी व्यक्तिगत रुपमै फिटनेस प्रशिक्षण गरिरहेका छन् ।