एजेन्सी – इंग्लिस क्लब चेल्सीले आउँदो समरमा आकर्षक प्रस्ताव आएको खण्डमा स्टार मिडफिल्डर एनगोलो कान्टेलाई बेच्ने निर्णय गरेको छ । कान्टेसँगको सम्झौता २०२३ सम्म रहेपनि चेल्सीले विश्वविजेता फ्रान्सका कान्टेलाई बेच्ने निर्णय गरेको हो ।

चेल्सीले कान्टेलाई बेच्ने निर्णय गरेसँगै फ्रेन्च क्लब पेरिस सेन्ट जर्मेन (पीएसजी) र स्पेनिस क्लब रियल म्याड्रिडले चासो देखाएको बुझिएको छ । चेल्सीले आकर्षक प्रस्ताव आएमा कान्टेलाई बेच्ने उल्लेख गरेको छ । २९ वर्षीय कान्टे सन् २०१६ मा ३२ मिलियन पाउन्डमा प्रिमियर लिग क्लब लेस्टर सिटीबाट चेल्सी पुगेका थिए । निकै प्रभावशाली मिडफिल्डर कान्टेले प्रिमियर लिगमा आफ्नो छाप छोड्न सफल भएका छन् ।

कान्टे लगातार दुई सिजन दुई फरक क्लबबाट इंग्लिस प्रिमियर लिग जित्ने खेलाडी हुन् । सन् २०१६ मा लेस्टरबाट प्रिमियर लिग जितेको कान्टेले अर्काे सिजन चेल्सीबाट प्रिमियर लिग जितेका थिए । रियलले कान्टे अनुबन्ध गर्न सक्ने योजना अघि बढाउने सम्भावना रहेको छ । यधपी रियलले कान्टेकै राष्ट्रिय टोलीका सहयात्रीहरु पल पोग्वा र केलियन एमबाप्पेलाई पनि लामो समयदेखि पछ्याइरहेको छ ।

यता फ्रान्सेली क्लब पीएसजीले पनि कान्टेको स्थिति नियालिरहेको छ । पीएसजीले कान्टेलाई आफ्नो जन्म भुमिमा फर्काउन आकर्षक प्रस्ताव पेश गर्ने सम्भावना छ । कान्टेले पछिल्लो सिजन चोटका कारण केही खेलहरु गुमाएका छन् । यो सिजन कान्टेले २२ खेल मात्रै खेलका छन् । जसमा उनले ३ गोल गरेका छन् । रक्षात्मक मिडफिल्डर भएपनि कान्टेले चेल्सीका लागि १६४ खेलमा २२ गोल गरेका छन् ।