एजेन्सी – ब्राजिलियन पूर्व स्टार रोनाल्डिन्हो महिना दिन भन्दा लामो जेल बसाईबाट हालै रिहा भएका थिए । पाराग्वेमा पक्राउ परेका उनलाई होटलमै सजाय काट्ने गरि मात्र रिहा गरिएको हो । फर्जी पासपोर्टका कारण उनी र उनको एजेन्ट समेत रहेका दाईसहित पक्राउ परेका थिए ।

रोनाल्डिन्होका दाजुभाईले ३२ दिन जेलमा बिताएका थिए । वकिलले उनीहरुलाई १६ लाख युरो धरौटीमा उनीहरुलाई छुटाएका हुन् । अहिले उनीहरुका पाराग्वेको राजधानीमा रहेको होटल पाल्मारोगमा बसेका छन् । बार्सिलोना र एसी मिलानका पूर्व स्टारले फाइभ स्टार होटलको सुविधा पाएका छन् । त्यस्तै उनका दाईले पनि सुइट दिइएको छ ।

१९ औं शताब्दीमा निर्माण गरिएको होटलमा कोभिड १९ का कारण उनीहरुलाई छुटमा होटलले सुविधा उपलब्ध गराइएरहेको छ । प्रेसिडेन्टल सुइटका लागि उनीहरुले एक रातको ८७ पाउन्ड तिर्नुपर्नेछ । गत महिना रोनाल्डिन्होलाई पाराग्वेका पूर्व खेलाडी निल्सन क्युभासले भेटपछि उनी कठिन अवस्थामा संघर्ष गरिरहेका बताएका थिए ।

‘रोनाल्डिन्हो निराश छन्, आशा गरौं उनी चाडै बाहिर आउनेछन्,’ उनले भनेका थिए, ‘जुन परिस्थितिबाट उनी गुज्रिरहेका छन्, त्यसबाट दुःखी छन् । आशा गरौं छिटै बाहिर आउनेछन् । ‘ जेलमा उनले फुटबल खेल्ने गरेको समाचार सार्वजनिक भएको थियो । उनको उच्च प्रदर्शनमा उनको टोली विजयी पनि भएको थियो । ब्राजिलले सन् २००२ मा विश्व कप जित्दा उनी टोलीको महत्वपूर्ण सदस्य थिए ।