एजेन्सी – जर्मन फुटबल लिग (डिएफएल) ले कोरोना भाइरस (कोभिड–१९) को सम्भावित त्रासका कारण स्थगित भएको जर्मन बुन्डेसलिगाको बाँकी खेल ‘क्लोज डोर’ मा खेलाउने निर्णय गरेको छ ।

डिएफएलले बुन्डेस लिगाको शीर्ष दुई श्रेणीको ३६ क्लबसँगको सहमतिमा यो सिजनको बाँकी रहेको खेलहरु क्लोज डोरमा खेलाउने सहमति गरेको हो । बुन्डेस लिगामा ९ चरणको खेल बाँकी छ । बुन्डेस लिगाको २५औं चरणको खेल सकिदा बायर्न म्युनिख ५५ अंक जोडेर शीर्षस्थानमा रहेको छ । बोरुसिया डर्टमन्ड ५१ अंक जोडेर दोस्रो स्थानमा रहेको छ ।

बुन्डेस लिगाका प्राय सबै टोलीले एक साताअघिबाट प्रशिक्षण थालिसकेका छन् । टोलीहरुले प्रशिक्षणमा त्यहाँको सरकारको निर्णयलाई ध्यानमा राख्दै सामाजिक दुरी कायम गरी सानो समूह बनाएर प्रशिक्षण गरिरहेका छन् । डिएफएलले ३० जुनसम्ममा सिजन सकाउने योजना बनाइसकेको छ । मे १७ या १९ बाट सिजन पुनः सुचारु गर्ने विषयमा अहिले छलफल भइरहेको छ । निर्णय आउन बाँकी छ ।

डिएफएलले क्लोज डोरमा खेलाउदा २५० जनाभन्दा बढीलाई मैदान प्रवेशमा रोक लगाउनेछ । जसमा खेलाडी, अफिसियल र लाइभ ब्रोडकास्टका सदस्यहरु रहनेछ । हाललाई बुन्डेसलिगा र लिगा २ अप्रिल ३० सम्म स्थगित गरिएको छ ।

‘जर्मनीमा मानिसहरु आफ्नो दैनिक जिवनमा फर्किन खोजिरहेका छन् । यसले बुन्डेसलिगा शुरु हुने संकेत गर्छ ,’ बुन्डेस लिगाका प्रमुख कार्यकारी क्रिष्टियन सेफर्टले भने, ‘यो सिजन अन्त्य गर्नु भनेको ५ वटा क्लबहरु गम्भिर आर्थिक संकटबाट बचाउनु हो । लिग सकाउन सकेको अवस्थामा उनीहरुलाई केही राहत मिल्नेछ ।’