एजेन्सी – स्पेनिस महारथी रियल म्याड्रिडले आफ्नो पुर्व लेजेन्ड तथा पोर्चुगिज सुपरस्टार फरवार्ड क्रिस्टियानो रोनाल्डो पुनः अनुबन्ध गर्ने योजना नरहेको क्लबनिकट स्रोतले एएसलाई बताएका छन् ।

विश्वव्यापी बनेको कोरोना भाइरस (कोभिड–१९) को कारण विश्व खेलकुदको अर्थतन्त्र नै संकटमा पर्न सक्ने अवस्थामा इटालियन क्लब युभेन्टसले आफ्नो सुपरस्टार रोनाल्डो बेच्ने तयारीको गरिरहेको छ । यसबीचमा रोनाल्डो आफ्नो पुर्व क्लब रियलले अनुबन्ध गर्न सक्ने अनुमान गरिएको थियो । तर, रियलले रोनाल्डो अनुबन्ध गर्ने योजना नरहेको बुझिएको छ ।

‘हाम्रो रोनाल्डो अनुबन्ध गर्ने कुनै योजना छैन । उनी रियलबाट बाहिरिएका कारण पुनः रियलमा जोडिन सक्ने अनुमान गरिएको हुन सक्छ ।’ स्पेनिस पत्रिका एएसमा उल्लेख छ ।

रियलले पछिल्लो समय युवा खेलाडीमा लगानी गर्ने मनासय बनाइरहेको छ । रियलले आर्थिक संकटलाई ध्यानमा राख्दै आउदो समरमा फ्रान्स तथा पीएसजीका युवा स्टार केलियन एमबाप्पे अनुबन्ध गर्न नसक्ने बताइसकेको छ ।

युभेन्टसले ५० मिलियन पाउन्डसम्म रोनाल्डो बेच्ने योजना बनाएको थियो । रोनाल्डो २०१८ मा १ सय मिलियन पाउन्डमा युभेन्टस पुगेका थिए । उनले युभेन्टसमा पनि उत्कृष्छ प्रदर्शन गरिरहेका छन् । रोनाल्डोले यो सिजन मात्रै युभेन्टसबाट ३२ खेलमा २५ गोल गरिसकेका छन् ।