एजेन्सी – पोर्चुगिज तथा इटालियन क्लब युभेन्टसका स्टार फरवार्ड क्रिस्टियानो रोनाल्डो आफ्नो पुर्व स्पेनिस क्लब रियल म्याड्रिडमा फर्कन सक्ने सम्भावना बढेको छ । 

इटालियन पत्रिका कोरिरे डेलो स्पार्ट्सका अनुसार युभेन्टसले आफ्नो स्टार फरवार्ड रोनाल्डोलाई म्याड्रिड फर्काउन चाहेको बुझिएको छ । जसका लागि युभेन्टसले सुरुवातमा ५० मिलियन पाउन्डमा प्रस्ताव गर्ने बुझिएको छ । यो प्रस्ताव रियलले स्वीकार्नेमा युभेन्टस विश्वस्त छ ।

पछिल्लो समय महामारीको रुपमा फैलिरहेको कोरोना भाइरस (कोभिड–१९) का कारण क्लबहरुले आउन सक्ने आर्थिक संकटलाई ध्यानमा राख्दै बचत गर्ने योजना बनाइरहेको छ । त्यसकारण पनि युभेन्टस आफ्नो स्टार खेलाडी बेच्न बाध्य हुन सक्नेछ ।

रोनाल्डो इटालियन सिरी ‘ए’ मा सर्वाधिक पारिश्रमिक लिने खेलाडी हुन् । रोनाल्डो २०१८ मा १०० मिलियन पाउन्डमा युभेन्टस पुगेका थिए । उनको सम्झौता २०२२ सम्म रहेको छ । यस अवधिमा युभेन्टसले रोनाल्डोलाई बेच्दै रकम बचत गर्ने मनासय बनाएको छ । तर, युभेन्टसका खेलाडीले पछिल्लो चार महिनाको पारिश्रमिक नलिने बताएपछि युभेन्टसले झन्डै ८० मिलियन पाउन्ड बचत गरिसकेको छ । रोनाल्डोले आफ्नो पारिश्रमिकको १० मिलियन पाउन्ड मात्रै गुमाउने छन् ।

अहिलेको अवस्थामा युभेन्टस जस्तो धनी क्लबले आफ्ना खेलाडीहरुसँग सम्झौता नवीकरण र भविष्यको भुक्तानीलाई पुर्नसंरचना नगरी समस्या समाधान गर्न नसक्ने बुझिएको छ । कोरोना महामारी अघि युभेन्टसका अध्यक्ष एन्ड्रिया अग्नेली रोनाल्डोसँग २०२४ सम्म नयाँ सम्झौताको शर्तमा सहमत हुनेमा विश्वस्त थिए । उनी युभेन्टसको लेजेन्ड हुनेमा ढुक्क थिए । तर, कोरोनाको कारण युभेन्टसको यो योजनामा धक्का लाग्नेछ । जसका कारण पनि रोनाल्डो सनसनीपुर्ण रुपमा रियलमा फर्कन सक्नेछन् ।

रोनाल्डोले रियलबाट ४३८ खेलमा ४५० गोल गरेका छन् । उनी रियलका सर्वाधिक गोलकर्तासमेत हुन् । उनले युभेन्टसबाट ७५ खेलमा ५३ गोल गरिसकेका छन् । समर्थकका दवावका कारण पनि ३५ वर्षीय रोनाल्डो रियल फर्कन सक्ने अनुमान गरिएको छ ।

रियलका प्रशिक्षक जिनेदिन जिदान विशेष गरी फ्रान्सका युवा स्टार केलियन एमबाप्पेको अनुबन्धमा केन्द्रित हुने थिए । तर, कोरोनाका कारण आर्थिम मन्दीको अवस्था सिर्जना हुन सक्ने भन्दै रियलले तत्काल एमबाप्पेलाई अनुबन्ध गर्न नसक्ने भएक छ । रियलले २०२१ को अन्त्यपछि एमबाप्पेलाई १३२ मिलियन पाउन्डमा अनुबन्ध गर्ने योजना बनाइरहेको छ ।