एजेन्सी – युईएफएका अध्यक्ष एलेकसेन्डर सेफेरिनको नजरमा लिभरपुल प्रिमियर लिगको च्याम्पियन नबनी प्रिमियर लिगको सिजन टुंगिने कुनै सम्भावना छैन ।

कोरोना भाइरस कोभिड १९ का कारण स्थगित भएको प्रिमियर लिग हुन नसकेको वा रद्द भएको अवस्था बेग्लै भएको उल्लेख गर्दै सेफेरिनले लिग पुनः सुरु भएको अवस्थामा लिभरपुलले लिग जित्ने निश्चित जस्तै भएको बताए । लिगको ८ चरणका खेल बाँकी रहँदा योर्गन क्लोपको टोली लिभरपुलको दोस्रो स्थानको म्यानचेस्टर सिटीको भन्दा २५ अंक बढी छ ।

‘यदि लिग पुन सुरु भयो भने म भन्न सक्नु लिभरपुल च्याम्पियन निश्चित बन्नेछ । यद्दपी गणतिय सम्भावना बाँकी छ, व्यवहारिक रुपमा भन्ने हो भने निश्चित प्राय छ,’ सेफेरिनले भने, ‘तर अब केहि गरि लिग हुन सकेन भने कुनै तरिकाबाट पनि च्याम्पियनका बारेमा टुंगो लगाउनुपर्ने हुन्छ । तर पनि म फेरि पनि भन्छु लिभरपुल विजेता नबन्ने कुनै सम्भावना छैन । ‘

खाली रंगशालामा लिग खेलाउनु पर्ने अवस्था भने त्यो समर्थकका लागि भने निराशाजनक हुने आफुले बुझेको उल्लेख गर्दै अध्यक्ष सेफेरिनले भने, ‘मलाई विश्वास छ विजेता यो वा त्यो बाटोबाट टुंगो लाग्नेछ ।’ सेफेरिनले इटाली र स्पेनको लिग पनि सुरु हुने विश्वास व्यक्ति गरे । यद्दपी इटाली र स्पेन कोराना भाइरसबाट अध्याधिक संक्रमित देश हुन् ।

‘म आशावादी छु । स्पेनिस लिग र इटालियन लिग पनि सम्पन्न हुनेछन् । सबै फुटबलका गतिविधि पुरानै अवस्थामा जानेछ,’ उनले भने, ‘तर पनि कुनै पनि कुराको ग्यारेन्टी गर्न सकिन्न । म वचन दिन पनि सक्दिन । हरेक देशको अवस्था कस्तो हुन्छ त्यहाँका गतिविधि त्यहि अनुसार अघि बढ्नेछन् । ‘