एजेन्सी – फरवार्ड थोमस मुलरले जर्मन क्लब बायर्न म्युनिखमा थप दुई वर्षको सम्झौता नवीकरण गरेका छन् । ३० वर्षीय मुलरले मंगलबार थप दुई वर्षको सम्झौता नवीकरण गरेका हुन् ।

यससँगै मुलर २०२३ सम्म बायर्नमै रहनेछन् । मुलरको सम्झौता अझै एक वर्ष बाँकी रहेको थियो । तर, क्लबले सम्झौता बाँकी रहँदै सम्झौता नवीकरण गरेको हो । मुलरको सम्झौता नवीकरणमा बायर्नका स्पोर्टिङ डाइरेक्टर हसन सलिहाअिदजिक र क्लबको बोर्ड सदस्य ओलिभर कान रहेका थिए । उनीहरुले विश्वव्यापी बनेको कोरोना भाइरस (कोभिड–१९) को त्रासलाई मध्यनजरमा राख्दै केही दुरी राख्दै तस्वीर खिचाएका थिए ।

निको कोभाक प्रशिक्षक रहँदा बायर्नमा मुलरको भविष्य अनिश्चित जस्तै बनेको थियो । तर, नयाँ प्रशिक्षक हान्सी फ्लिक मुलरको सम्झौता नवीकरण गर्न सहमत भएको हो । ‘क्लबमा राम्रो भावनाका साथ दुवै पक्षबाट सम्झौता नवीकरण भएको छ । एकदमै खुसी छु । यसले मलाई थप हौसला प्रदान गरेको छ । बायर्न मेरो रोजगारदाता मात्रै होइन मैले उत्कृष्ट समय व्यतित गरेको हो क्लब हो । ’ मुलरले क्लबको आधिकारिक वेवसाइटमा लेखेको छ ।

क्लबका स्पोर्टिङ डाइरेक्टर हसनले मुलरसँग पुन सम्झौता नवीकरण गर्न पाउदा खुशी रहेको बताएका छन् । ‘उनी एक विशेष खेलाडी हुन् । उनले क्लबमा छुट्टै पहिचान बनाएका छन् । उनले बायर्नमा त्यस्तै सफलता र सफल क्षण बिताएका छन्,’ हसनले भने, ‘मुलरसँग के छ, हामीलाई थाहा छ । बायर्नसँग के छ मुलरलाई पछि थाहा छ । अब हामीले लामो कुरा गर्ने पर्दैन । उनी २०२३ सम्म बायर्नमा रहनेछन् ।’

मुलर २००० देखि निरन्तर बायर्नमा रहेका छन् । उनले बायर्नबाटै युथ करियर शुरु गर्दै २००८ मा सिनियर टोलीमा स्थान बनाएका थिए । त्यसयता मुलर क्लबको नियमित सदस्य रहेका छन् । मुलरले बायर्नबाट ८ जर्मन बुन्डेस लिगा, ५ जर्मन कप र समान एकपटक च्याम्पियन्स लिग, युइएफए सुपर कप र फिफा क्लब वल्डकप जितेका छन् । मुलरले यो सिजन बायर्नबाट ३६ खेलमा १० गोल गरेका छन् ।