एजेन्सी – खेलाडी र प्रशिक्षकका रुपमा जिनेदिन जिदानप्रति रियल म्याड्रिडका समर्थकमा पूर्ण आदरभाव छ । तर, प्रशिक्षकका रुपमा उनले सान्टियागो बेर्नाबाउमा पहिलो कार्यकालमा जस्तो सम्मान पाएका थिए, सायद अहिले त्समा केहि कमी आएको मान्नेहरु पनि छन् ।

पछिल्लो सिजन उनले दोस्रो पटक टोलीको नेतृत्व सम्हालेपछि सोचे अनुरुप प्रदर्शन हुन नसकेपछि उनीमाथिको दृष्टिकोणमा केहि परिवर्तन आएको अनुमान गरिएको छ । कारण उनको टोलीले गत सिजन वा यो सिजन पनि सोचे अनुरुपको प्रदर्शन गर्न सकेको छैन । प्रि सिजनमै टोलीको प्रदर्शन सन्तोषजनक हुन सकेको थिएन ।

सिजनको सुरुवात पनि निराशाजनक रह्यो । जसका कारण टोलीमाथि दबाब रहिरह्यो । रोनाल्डो टोलीमा रहँदा पहिलो कार्यकालमा जिदानले लगातार च्याम्पियन्स लिगमा तहल्का नै मच्चाएका थिए । तर टोलीमा भरपर्दा स्टार नहुँदा जिदानलाई पनि केहि कठिनाई भैरहेको छ । पेरिस सेन्ट जर्मेन (पिएसजी) र रियल मालोर्कासँग पराजित भएपछि रियलको यो सिजन उपाधि जित्ने सम्भावनामा चुनौती थपिएको छ ।

अर्को तर्फ ला लिगामा पनि टोलीले चुनौतीको सामना गर्नुपरेको छ । कोरोना भाइरस कोभिड १९ का कारण ला लिगा स्थगित हुनु अघि २७ खेलमा २५ अंक गुमाइसकेको छ । ३ खेलमा हार बेहोरेको टोलीले ८ खेलमा बराबरी गरेको थियो । लिग स्थगित हुनुअघि लेभान्टे र रियल बेटिससँग पराजित हुँदा जिदानको टोलीको उपाधि दौडमा धक्का लागेको थियो ।

अब फुटबल पुन सुरु हुँदा टोलीले शीर्षस्थानको बार्सिलोनासँगको अंक दुरी घटाउन प्रयास गर्नेछ । ला लिगामा बार्सिलोनाको भन्दा रियलको २ अंक कम छ । कोपा डेल रेबाट बाहिरिसकेको टोलीका लागि लिग उपाधिको सम्भावना ज्युँदै छ । च्याम्पियन्स लिगको अन्तिम १६ मा पुगेको भएपनि टोलीलाई च्याम्पियनको दावेदारको रुपमा भने हेरिएको छैन ।