एजेन्सी – इंग्लिस क्लब म्यानचेस्टर युनाइटेड तथा फ्रान्सका पुर्व फरवार्ड लोइस साहाले समकालीन खेलाडीको रुपमा आफ्नो पूर्व सहयात्री पोर्चुगल तथा इटालियन क्लब युभेन्टसका फरवार्ड क्रिस्टियानो रोनाल्डो उत्कृष्ट खेलाडी रहेको बताएका छन् ।

४१ वर्षीय साहाले एक अन्तर्वार्ताका क्रममा समकालीन फुटबलमा उनी उत्कृष्ट खेलाडी रहेको र उनले जस्तो अहिलेका कुनै पनि खेलाडीले गर्न नसक्ने दावीसमेत गरेका छन् ।  ‘रोनाल्डोले अहिले फरक–फरक देशको लिगमा हासिल गरेको उपलब्धिले उनी उत्कृष्ट खेलाडी रहेको पुष्टि गर्दछ । यस्तो सफलता अन्य खेलाडीले पाउन मुस्किल छ,’ लोइसले भने ।

‘उनले जति गरेका छन् । त्यसलाई जो कोहीले भेटाउन मुस्किल छ । उनको सफलता एकदमै लोभलाग्दो छ । रोनाल्डोप्रति मेरो ठुलो सम्मान छ । उनीसँग मैले खेल्ने अवसर पाए ।’ यस्तै साहाले रोनाल्डोले अझैपनि उही स्तरमा खेलिरहेको र उनी जो कोही युवा खेलाडीको आदर्श खेलाडी रहेको थपे ।

‘रोनाल्डोले यो उमेरमा पनि युभेन्टसबाट सानदार प्रदर्शन गरिरहेका छन् । उनको लागि उमेरको अंक ठुलो होइन । उनी त्यसबेला देखि नै क्षमतावान् थिए । जतिबेला मैले पहिलोपटक म्यानचेस्टर युनाइटेडमा खेलेका थिए ।’ साहाले भने । साहाले इटालीमा पनि थुप्रै उपाधि जित्न सक्ने बताएका छन् ।

साहाले चार सिजन २००४ देखि २००८ सम्म रोनाल्डोसँग खेलेको थिए । उनले २०१३ बाट अन्तर्राष्ट्रिय फुटबलबाट सन्यास लिइसकेका छन् ।
रोनाल्डो २००३ मा म्यानचेस्टर युनाइटेडमा आएका थिए । २००९ सम्म त्यहाँ रहँदा रोनाल्डोले २९२ खेलमा ११८ गोल गरेका थिए । त्यसपछि उनी स्पेनिस क्लब रियल म्याड्रिड पुगेका थिए । २००९ देखि २०१८ सम्म रियलमा रहँदा रोनाल्डोले ४३८ खेलमा ४५० गोल गरेका छन् । अहिले युभेन्टसमा रहेका रोनाल्डोले ७५ खेलमा ५३ गोल गरिरसकेका छन् ।