एजेन्सी – इंग्लिस क्लब टोटेनहम हट्सपरका दक्षिण कोरियाली फरवार्ड ह्युङ मिन सनको अनिवार्य सैन्य तालिमका सुरु भएको छ ।  कोरोनाका कारण लिग प्रभावित भएपछि क्लबले उनलाई तालिममा सहभागी हुन दिएको हो ।

टोनेहमले सन १ महिनाको लागि आफ्नो देशको सेवाको लागि देश कोरिया जाने र उनी कम्तीमा पनि मेको मध्यपछि मात्रै उपलब्ध हुने विज्ञप्तिमा उल्लेख गरेको छ । दक्षिण कोरियामा २८ वर्षमुनिका पुरुषले अनिवार्य सैन्य सेवा दिनुपर्ने प्रावधान छ । सोही अनुसार सन कोरिया प्रस्थान गरेका हुन् । फरवार्ड सन जुलाईमा २८ वर्ष पुग्दैछन् ।

सन अहिले चोटका कारण मैदान बाहिर रहेका छन् । सनले फेब्रुअरी १८ मा एस्टन भिल्लामाथि ३–२ को जित निकालेको खेलमा हातमा चोट बोक्न पुगेका थिए । पछिल्लो महिना क्लबले सनलाई आफ्नो घर फर्कन अनुमती दिएको थियो । उनले सिजनका बाँकी खेलमा सहभागिता जनाउने सम्भावना न्यून छ । यद्यपि सिजन केहि लामो समय लम्बिएको खण्डमा उनले अन्तिमका केहि खेल खेल्न सक्नेछन् ।

सनकै कप्तानीमा दक्षिण कोरियाले सन् २०१८ मा एसियाली खेलमा स्वर्ण पदक जितेको थियो । सोही कारण उनको २१ महिनाको अनिवार्य सैन्य तालिममा छुट भएको थियो । उनले चार साताको अनिवार्य सैन्य तालिम भने गर्नुपर्ने भएकाले यो समय सदुपयोग गरेका हुन् । उनी मार्चको अन्त्यसम्म इंग्ल्यान्डमै सेल्फ क्वारेन्टाइनमा रहेका थिए । सन आफ्नो सैन्य तालिमपछि लन्डन फर्कनेछन् ।