एजेन्सी – इंग्ल्यान्ड फुटबल एसोसिएसन (एफए) ले इंग्लिस प्रिमियरको लिगको नयाँ सिजन अघि दुई सातामात्रै ब्रेक गराउने तयारी गरेको छ ।

प्रिमियर लिगको यो सिजन कोरोना भाइरस (कोभिड–१९) कारण अन्त्य हुनेमा शंका छ । तर, पनि एफएले यो सिजनको प्रिमियर लिग जसरी पनि सकाउने योजना बनाएको छ । तर, नियमित तालिका अनुसार यो सिजन मे मा सकिने र अर्काे सिजन अगस्ट ८ बाट शुरु हुने तालिका थियो ।

एफएले प्रिमियर लिगका २० क्लबसँग भिडियो कन्फ्रेसमार्फत सिजनको बारेमा छलफल गरेको थियो । एफएले यो सिजन जुन देखि अगस्टमा सकाउने योजना बनाएको छ । अर्काे सिजन अगस्टबाट हुने तालिका छ । एफएफले प्रिमियर लिगका क्लबहरुलाई दुई सिजनको बीचमा कम्तीमा पनि दुई साताको मात्रै विश्राम हुन सक्नेबारे जानकारी गराएका छन् ।

क्लबले अघिल्लो सिजनको अन्त्यदेखि नै खेलाडीहरु फिट रहने, टिम पनि संगठित हुने र दुई साताको प्रि–सिजन ठीकै हुने बताएका छन् । यसअघिको प्रि सिजन झन्डै पाँच साता चल्ने गर्दथ्यो ।  तर, क्लब र मेडिकल स्टाफले दुई सिजनको अवधिमा दुई साताको विश्रामले खेलाडीको चोटको सम्भावनाबारे चिन्ता व्यक्त गरेका छन् ।

प्रिमियर लिगको ९ चरणको खेल बाँकी रहँदा मर्सिसाइड क्लब लिभरपुलले २५ अंकको फराकिलो अग्रता बनाएको छ । लिभरपुलको २९ खेलबाट ८२ अंक छ । दोस्रो स्थानको म्यानचेस्टर सिटीको २८ खेलबाट ५७ अंक छ । लिभरपुललाई उपाधि जित्न केवल दुई जितको खाँचो छ ।