एजेन्सी – जिनेदिन जिदानले दोस्रो पटक रियल म्याड्रिडको कमान सम्हाल्दा उनको योजनामा ग्यारेथ बेल थिएनन् । तर, बेललाई बेच्ने योजना सफल नभएपछि वेल्सका फरवार्डलाई लिएर खेलाउनु पर्ने अवस्थामा जिदान पुगे ।

जुलाईमा फ्रान्सेली प्रशिक्षकले भनेका थिए मलाई बेल टोलीमा चाहिदैन । तर बेल क्लब छाडेर जाने परिस्थिति बनेन । जसलाई स्वीकार्दै जिदानले बेललाई सिजनको पहिलो खेलमै पहिलो रोजाईमा राखे । तेस्रो खेलमा उनले भिल्लारियलविरुद्ध गोल पनि गरे । त्यसपछि भने बेलबाट गोल निस्केन ।

रियलमा अहिले सर्वाधिक पारिश्रमिक लिने बेलले सेप्टेम्बर १ देखि गोल गरेका छैनन् । लगातार दोस्रो सिजन उनले अपेक्षा अनुसारको प्रदर्शन गर्न सकेनन् । बेलका मैदान बाहिरको गतिविधि पनि विवादित रहे । घाइते भएको बताउँदै आराम गरिरहेका बेल एक पटक वेल्स, गल्फ , म्याड्रिडको ब्यानर बोकेका थिए । चोटकै काराण देखाउँदै उनी सुपर कप डी स्पानामा अनुपस्थित रहे ।

बेलले बेला बेला टोलीको अनुशासन तोडेकै कारण ओलोचन पनि खेप्नु परेको थियो । कतिपय अवस्थामा आफु नखेलेको दिन उनी चाँडै रंगशालाबाट बाहिरिने गरेका थिए । यहि अवस्थाको निरन्तरता रहँदा बेल जिदानको रोजाईमा पर्ने छैनन् । त्यसले पनि यसपटक रियलले बेललाई बेच्ने सम्भावना बढी छ ।