एजेन्सी – इंग्ल्यान्ड तथा जर्मन क्लब बोरुसिया डर्टमन्डका युवा स्टार जाडोन सान्चोले इंग्लिस क्लब म्यानचेस्टर युनाइटेडसमक्ष अनुबन्धको लागि शर्त राखेको छ ।

सान्चोले म्यानचेस्टर युनाइटेड अर्काे सिजन च्याम्पियन्स लिगमा छनोट हुन सकेको अवस्थामा मात्रै त्यहाँ आउन सक्ने र अन्यथा अनुबन्ध प्रस्ताव अस्वीकर गरिने बताएको छ । पछिल्लोपटक युरोपियन क्लव फुटबलमा चर्चामा रहेका खेलाडी सान्चोले यदि युनाइटेड अर्को सिजनको च्याम्पियन्स लिगमा स्थान बनाउन नसके आफु नआउने बताएको रिपोर्टले उल्लेख गरेको छ ।

२० वर्षीय युवा स्टार सान्चो अनुबन्ध गर्न प्रिमियर लिग क्लब म्यानचेस्टर युनाइटेडसँगै चेल्सीले दौडधुप गरिरहेका छन् । युनाइटेडलाई शर्त राखेपनि चेल्सीको लागि भने यो अवसर खुल्ला रहेको छ । द सनका अनुसार २० बर्षे सान्चोले अर्को सिजनको च्याम्पियन्स लिग खेल्ने चाहना राखेको र अर्को क्लवमा जाँदा त्यो मौका अनिवार्य पाउनुपर्ने मनसायमा छन् ।

डर्टमन्डका विंगर सान्चोलाई अनुबन्ध गर्ने योजना लिभरपुलले ड्रप गरेको थियो । युनाइटेड सान्चोलाई साताको चार लाख पाउण्डमा अनुबन्ध गर्न तयार रहेको बताइएको छ । यो सिजनको बुन्डेस लिगामा उत्कृष्ट प्रदर्शन गरेका सान्चोले १७ गोल गर्नुका साथै १९ असिष्ट दिएका छन् । डर्टमन्डले सान्चोलाई कम्तीमा पनि १०० मिलियन पाउन्डमा बेच्ने तयारी गरेको छ ।

चेल्सी र युनाइटेडले सान्चोलाई मोटो रकम खर्चन तयार छ । तर, कोरोना भाइरसको कारण पनि क्लबलाई केही प्रभाव पर्न सक्नेछ । युनाइटेड प्रिमियर लिगको पाँचौ स्थानमा रहेको छ । ३ अंक बढी रहेको चेल्सी चौथो स्थानमा रहेको छ ।

विश्वव्यापी बनेको कोरोना भाइरस (कोभिड–१९) का कारण प्रिमियर लिगसहित विश्वको फुटबल गतिविधि ठप्प छ । अप्रिल अन्तिमसम्म लिगहरु स्थगित गरिएपनि त्यसपछि शुरु हुने या नहुने भन्न सकिने अवस्था नै बनेको छैन ।