एजेन्सी – ओस्कार टाबारेजले राजीनामा गरेपछि जर्मनीका जोचिम लो सबै भन्दा लामो समय कुनै पनि राष्ट्रिय टोली सम्हाल्ने प्रशिक्षक बनेका छन् । टाबारेजले सन् २००६ देखि उरुग्वेको राष्ट्रिय टोलीलाई प्रशिक्षण दिएका थिए । हालै उनीसहित ४ सय जनालाई उरुग्वे फुटबल संघले पदमुक्त गरेको थियो ।

सन् २००४ मा योगर्न क्लिन्स्म्यानका सहायक प्रशिक्षक बनेका लोले २००६ जुलाई १२ मा जर्मन टोलीको बागडोर सम्हालेका थिए ।
झन्डै डेढ दशक लामो प्रशिक्षणमा लोले जर्मन फुटबलमा एउटा विरासत बनाएका छन् । प्रशिक्षण र रणनीति भन्दापनि खेलाडीबीचको समन्वय र मनोबल उच्च पार्नेमा लोलाई माहिर मानिन्छ ।

जर्मन टोलीमा आबद्ध हुनु अघि लोको क्लब प्रशिक्षण भने खासै उल्लेखनिय छैन । १९९७ मा उनले स्टुटगार्टका लागि डिएफबी पोकल ट्रफी जिताएका थिए । त्यसको ५ वर्षपछि उनको प्रशिक्षणमा एफसी टिरोल अष्ट्रियन च्याम्पियन बनेको थियो । ती दुई सफलताका बीचमा लोले जर्मन फुटबलको दोस्रो डिभिजनको कार्लस्रुहर एसजीलाई प्रशिक्षण दिएका थिए ।

तर, १८ खेलमा १ खेलमात्र जितेपछि क्लबले उनलाई बर्खास्त गरेको थियो । त्यस्तै २००० उनी टर्किज क्लब एडास्पेरमा आबद्ध भए । एक वर्ष त्यहाँ रहँदा उनले कुनै सफलता पाउन सकेनन् । २००६ को विश्व कपमा तेस्रो स्थान प्राप्त गरेपछि जर्मन फुटबल संघले लोलाई लिएर जोखिम मोल्यो र उनलाई मुख्य प्रशिक्षक नियुक्त गर्यो ।

लोले राष्ट्रिय टोलीले आक्रमण फुटबल खेल्नु पर्नेमा जोड दिएका हुन् । त्यसको प्रभाव पनि टोलीमा पर्दै जान थाल्यो । जर्मनी टोली युरोपियन च्याम्प्यिनसिपमा उपविजेता बन्यो । फाइनलमा टोली फ्रान्ससँग पराजित भएको थियो । माइकल बालाक, ट्रोस्टेन फ्रिन्ङ्स र जेन्स लेहमानको त्यो अन्तिम प्रतियोगिता थियो । त्यो समयमा फिलिप लाहम, बास्टियन स्वान्सटाइगर र लुकास पोडोलोस्कीहरुले टोलीलाई सम्हालेका थिए ।

युरोपियन च्याम्पियनको फाइनल खेलेको २ वर्षपछि जर्मनी टोली विश्व कपको सेमिफाइनलमा पुगेको थियो । त्यहाँ टोली स्पेनसँग पराजित भयो । त्यसअघि जर्मनीले इग्ल्यान्डलाई ४–१ र अर्जेन्टिनालाई ४–० ले हराएको थियो । मसुट ओजिल, सामी खेडिरा, थोमस मुलरहरु टोलीका महत्वपूर्ण सदस्यका रुपमा अघि बढ्दा भने गोलपोष्टमा म्यानुल नुयोरको बलियो उपस्थिति रह्यो ।

२०१२ को युरोपिनय च्याम्पियनसिपमा जर्मनी फेरि सेमिफाइनल भन्दा अघि बढ्न सकेन । तर, टोली २०१४ मा पुगेर विश्व कप जित्न सफल भयो । आयोजक ब्राजिललाई सेमिफाइनलमा ७–१ ले हराएको जर्मनीले फाइनलमा अर्जेन्टिनालाई १–० ले निराश पारेको थियो ।

२०१६ को युरोपियन च्याम्पियनसिपको सेमिफाइनलमा फ्रान्ससँग पराजित जर्मनी पछिल्लो विश्व कपमा भने समूहच चरणबाटै बाहिरिएको थियो । त्यसका बावजुद पनि जर्मन फुटबलले लोमाथिको विश्वासलाई यथावत राखेको छ ।

पछिल्लो समयमा थोमस मुलर, जेरोमी बोएटेङ र माट्स हुमेल्सले टोलीमा पर्न छाडिसकेका छन् । नयाँ खेलाडीकाहरुको आगमन भएको छ । लोले पुराना खेलाडीले अब नयाँ खेलाडीलाई स्थान दिनुपर्ने भन्दै उनीहरुलाई टोलीमा नसमेट्ने घोषणा गरेका थिए ।