एजेन्सी – स्पेनिस क्लब रियल म्याड्रिड तथा इटालियन क्लब एसी मिलानका ब्राजिली स्टार प्लेमेकर रिकार्डाे काकाले आधुनिक फुटबलका दुई हस्ती लियोनल मेस्सी र क्रिस्टियानो रोनाल्डोमध्ये मेस्सी रोज्ने बताएका छन् ।

गोलडटकमको प्रश्नोत्तर कार्यक्रमको जवाफ दिने क्रममा इन्स्टाग्रामबाट लाइभमा काकाले अहिलेको विश्व फुटबलमा दुवै सर्वश्रेष्ठ रहेको तर, आफ्नो रोजाई मेस्सी रहने बताएका हुन् । ‘मैले रियलबाट रोनाल्डोसँग खेलेको छु । उनी वास्तवमै अचम्मका छन् । तर, म मेस्सी रोज्छु,’ काकाले भने, ‘उनी एक प्रतिभाशाली, विशुद्ध प्रतिभावान हुन् । उनले खेल्ने तरिका अविश्वसनीय छ ।’

यस्तै काकाले रोनाल्डो एक मेसिनको रुपमा रहेको समेत बताए । ‘रोनाल्डो एक मेसिन हो । रोनाल्डो शक्तिशाली र छरितो मात्र होइन । मानसिक रुपमा समेत अब्बल छन् ,’ एक पटकको बालोन डिओर विजेता काकाले भने, ‘उनी जहिले पनि उही स्तरमा खेल्न सक्छन् । उनी हार चाहदैनन् । यो नै रोनाल्डोको सबैभन्दा अविश्वसनीय चीज होे ।’ काकाले आधुनिक फुटबलमा मेस्सी र रोनाल्डो दुवैलाई एकै समयमा देख्न पाउनु गर्वको कुरा रहेको बताए ।

काकाले सन् २००७ को बालोन डी’ओरमा रोनाल्डो र मेस्सीलाई पछि पार्दै अवार्ड जितेका थिए । रोनाल्डो दोस्रो तथा मेस्सी तेस्रो स्थानमा रहेका थिए । त्यसपछिको १२ संस्करणमा यि दुई खेलाडीले बालोन डि’ओरको अवार्ड ११ पटक बाँडेका छन् ।

एक संस्करणमा क्रोएसिया तथा स्पेनिस क्लब रियल म्याड्रिडका लुका मोड्रिचले अवार्ड हात पारेका थिए । मेस्सीले ६ पटक तथा रोनाल्डोले ५ पटक बालोन डी’ओर जितेका छन् । यी दुई खेलाडीमध्ये को उत्कृष्ट भन्नेमा सधै विवाद रहदै आएको छ ।