एजेन्सी – सिजनको सुरुवाती ट्रान्सफर विन्डोमा ब्राजिल तथा फ्रेन्च क्लब पेरिस सेन्ट जर्मेन (पीएसजी) का स्टार फरवार्ड नेयमार अनुबन्ध गर्न स्पेनका दुई ठूला क्लब बार्सिलोना र रियल म्याड्रिड लागिपरेका थिए ।

क्याटलान क्लब बार्सिलोना नेयमार अनुबन्धको नजिक पुग्दा अन्तिम समयमा चुकेको थियो । नेयमार अनुबन्ध गर्न बार्सिलोनाले बढी चासो देखाएपछि सुरुवातमा केहि अग्रसर देखिएको रियल पछि हटेको थियो । तर, यो सिजन दुवै क्लबले नेयमारलाई अनुबन्ध गर्न असफल रहे । अब आउँदो समरमा नेयमार अनुबन्ध गर्न यि दुई क्लबले फेरि प्रयास थाल्ने पक्का छ ।

तर, बार्सिलोनाले नेयमारलाई रियल जानबाट रोक्नको लागि २०२० मा नेयमारलाई अनुबन्ध गर्ने वचन दिएको खुलासा भएको छ । स्पेनिस पत्रिका मुन्डो डिपोर्टिभोको अनुसार बार्सिलोनाले नेयमारलाई रियल जानबाट रोक्नको लागि आउँदो समरमा पुन सम्झौता गर्ने वचन दिएको उल्लेख छ ।

नेयमार २०१७ मा बार्सिलोनाबाटै १९८ मिलियन पाउन्डमा पीएसजी पुगेका थिए । मुन्डोका अनुसार रियलले पनि हस्ताक्षर गर्न सक्ने भएपछि बार्सिलोनाले रियल जानबाट रोक्नकै लागि नेयमारलाई वचन दिएको उल्लेख छ ।

‘रियल र पीएसजीबीच राम्रो सम्बन्ध रहेको छ । तर, नेयमारको चाहना बार्सिलोना जाने रहेको थियो । उनलाई रोक्न बार्सिलोनाले नेयमारलाई यो वर्ष नभए अर्काे वर्ष आउने विकल्प समेत दिएको छ । बार्सिलोना नेयमार भित्राउन निश्चिन्त देखिन्छ ,’ मुन्डोको दावी छ ।

यद्दपि नेयमारको सम्झौता रकममा कुरा नमिल्दा पीएसजीका मालिक नासिर अल खेलाफी बेच्न सहमत भएनन् । अहिले बार्सिलोनाले नेयमारसँगै अर्जेन्टिनी लोउटारो मार्टिनेजलाई अनुबन्ध गर्ने विषयले सञ्चार माध्यममा स्थान पाइरहेका छन् । यि दुई खेलाडी अनुबन्ध गर्न बार्सिलोनाले फिलिपे कौटिन्हो, एन्टोइन ग्रिजमन र औसमाने डेम्वेलेलाई बेच्ने योजना बनाइरहेको छ ।