एजेन्सी – कोरोना भाइरस (कोभिड–१९) का कारण अहिले विश्व खेलकुद गतिविधि ठप्प छ । क्लब फुटबलहरु ३० अप्रिलसम्म स्थगित छन् । टोकियो ओलम्पिक, युरोकप र कोपा अमेरिका कप जस्ता तीन ठुला प्रतियोगिता अर्काे वर्ष गर्ने निर्णय भइसकेको छ । 

कोरोनाले विश्वलाई नै आतकिंत बनाइरहँदा खेलाडीहरु सेल्फ क्वारेन्टाइनमा रहेरै आफुलाई फिट बनाइरहेका छन् । यसबीचमा खेलाडी सरुवाको विषयले सञ्चार माध्यममा स्थान पाइरहेको छ । खेलाडी सरुवा वर्षको दुईपटक मात्रै रहने भएकाले अहिले खेलाडी अनुबन्ध गर्न सकिने अवस्था छैन । तर, समरमा खेलाडी सरुवाको लागि क्लबले अहिले देखि नै तयारी गरिरहेका छन् ।

अहिले मुख्य गरी बार्सिलोनाले दुई स्टार फरवार्ड ब्राजिली नेयमार जुनियर र अर्जेन्टिनी लोउटारो मार्टिनेज अनुबन्धको विषयले चर्चा पाइरहेको छ । बार्सिलोनाले आउदो समरमा यि दुई खेलाडी अनुबन्ध गर्न सक्लान् ? अहिले यो चासोको विषय बनेको छ । बार्सिलोनाले आफ्नो अग्रपङ्तिमा लियोनेल मेस्सीलाई साथ दिनको लागि यि दुई खेलाडीलाई जसरी पनि अनुबन्ध गर्ने योजना बनाएको छ ।

बार्सिलोनाले नेयमार अनुबन्धको लागि यसै सिजन एट्लेटिको मड्रिडबाट अनुबन्ध गरेका एन्टोइन ग्रिजमनलाई फ्रेन्च क्लब पीएसजीमा साटरफेर गर्ने तयारी गरेको छ । मार्टिनेज अनुबन्ध गर्न बार्सिलोनाले औसमाने डेम्वेले र लोनमा बायर्नमा रहेका फिलिपे कौटिन्होलाई बेच्ने योजना बनाएको छ । यसका लागि बार्सिलोनाले २३३ मिलियन पाउन्ड खर्च गर्नुपर्ने हुन्छ । यति रकम खर्च गर्नको लागि बार्सिलोनालाई सम्भव हुने अनुमान गरिएको छ ।

कोरोनाका कारण क्लबलाई आर्थिक संकट पर्न सक्ने भन्दै क्लबले खेलाडीको ७० प्रतिशत पारिश्रमिक कटौती गर्ने निर्णय गरिसकेको छ । तर, क्लबले नेयमार र मार्टिनेजलाई अनुबन्ध तथा मेस्सीको सम्झौता थप्ने तयारी गरिरहेको छ ।  ग्रिजमनले यो सिजन बार्सिलोनामा मन जित्ने खेल पस्कन सकेका छैनन् । डेम्वेले चोटका कारण लगातार मैदान बाहिर र अर्का फरवार्ड लुइस सुआरेज पनि चोटका कारण उपस्थित छैनन् ।