एजेन्सी – ब्राजिली राष्ट्रिय टोलीका मुख्य प्रशिक्षक एडेनर लियोनार्दाे बाच्ची (टिटे)ले नेयमार टोलीका लागि आवश्यक खेलाडी रहेपनि टोलीमा नभई नहुने खेलाडी नरहेको बताएका छन् ।

गोलसँगको कुराकानीका क्रममा टिटेले विश्व फुटबलका स्टार नेयमार टोलीका लागि आवश्यक खेलाडी रहेपनि नभई नहुने खेलाडी भने नरहेको बताएका हुन् । टिटे सन् २०१६ देखि ब्राजिली टोलीको मुख्य प्रशिक्षक रहेका छन् । उनको प्रशिक्षणमा ब्राजिलले ४८ खेलमा ३४ मा जित, १० बराबरी र ४ हारको नतिजा निकालेको छ ।

‘उनी टोलीको लागि आवश्यक खेलाडी हुन् । उनीसँग टोलीमा रहने क्षमता र प्रतिभा छ । यही प्रतिभाकै कारण उनी लामो समयदेखि ब्राजिलको राष्ट्रिय टोलीको महत्वपुर्ण फरवार्ड बनेका छन्,’ गोलसँगको कुराकानीमा टिटेले भने, ‘म पनि नेयमारको प्रशंसक हु । नेयमारले राम्रो प्रदर्शन गरे उनीमा अप्रत्यासित क्षमता छ । उनी एकल र टिममा भिज्न सक्ने खेलाडी हुन् । जुन अरु खेलाडीमा छैन । तर, यति हुँदैमा उनी नभई नहुने भन्ने होइन । उनी सँधै उही स्तरमा खेल्ने सम्भावना रहँदैन । उतारचढाव आउन सक्छ ।’

नेयमारले ब्राजिलका लागि १०१ खेलमा ६१ गोल गरेका छन् । उनी ब्राजिलबाट सर्वाधिक गोल गर्ने तेस्रो खेलाडी हुन् । उनीभन्दा अघि महान् हस्ती पेले (७७) र रोनाल्डो (६२) गोल रहेका छन् । २८ वर्षीय नेयमारले ब्राजिलबाट एकपटक कन्फेडेरेसन कप र एकपटक ओलम्पिक जितेका छन् ।

ब्राजिलले गतवर्ष कोपा अमेरिका जित्दा नेयमार चोटका कारण टोली बाहिर रहेका थिए । उनले यो सिजन फ्रेन्च क्लब पेरिस सेन्ट जर्मेन (पीएसजी) बाट २३ खेलमा १८ गोल र ६ असिस्ट दिएका छन् ।