एजेन्सी – जर्मन प्रशिक्षक योर्गेन क्लोपले इंग्लिस क्लब लिभरपुलमा उत्कृष्ट समय व्यतित गरिरहेका छन् । उनकै प्रशिक्षणमा लिभरपुलले अघिल्लो सिजनको युरोपेली क्लब फुटबलको सबैभन्दा ठुलो युइएफए च्याम्पियन्स लिगको उपाधि जित्न सफल भएको थियो । 

२०१५ मा जर्मन क्लब बोरुसिया डर्टमन्डबाट लिभरपुल आएयता ५२ वर्षीय क्लोपले लिभरपुलको प्रदर्शनमा व्यापक परिवर्तन गरिदिएका छन् । सुरुवाती समयमा औसतको प्रदर्शन गरेपनि लिभरपुले पछिल्लो दुई वर्षमा उत्कृष्ट प्रदर्शन गरेका छन् । अघिल्लो वर्ष इंग्लिस प्रिमियर लिगको उपाधिनजिक पुगेर पनि लिभरपुल अन्तिम समयमा चुकेको थियो ।

तर, यो सिजन लिभरपुल प्रिमियर लिगको ९ खेल बाँकी छदै उपाधिनजिक उभिएको छ । लिभरपुललाई अब प्रिमियर लिग च्याम्पियन बन्न मात्रै दुई जितको खाँचो छ । कोरोना भाइरस (कोभिड–१९) का कारण अहिले विश्वको खेलकुद गतिविधि ठप्प छ । प्रिमियर लिग ३० अप्रिलसम्मलाई स्थगित छ । त्यसपछि पनि शुरु हुने या नहुने अन्योलता छ ।

क्लोपले यसअघि बोरुसिया डर्टमन्डमा पनि उत्कृष्ट समय व्यतित गरेका थिए । उनले जर्मन बुन्डेसलिगामा बायर्नको वर्चस्व तोड्दै उपाधि जित्न सफल भएको थियो । यिनै प्रशिक्षक क्लोपलाई जोगाउन लिभरपुलले गम्भीर चासो लिएको छ । क्लबसँगको सम्झौता २०२४ सम्म रहेपनि क्लोपलाई अन्य क्लब र देशले पनि मुख्य प्रशिक्षक बनाउने प्रयास गरिरहेका छन् ।

उनलाई अनुबन्ध गर्न जर्मन क्लब बायर्न म्युनिख, इंग्लिस क्लब म्यानचेस्टर युनाइटेड र आर्सनलले पनि प्रयास गरेको थियो । तर, उनी एनफिल्डमै रहे । क्लोपलाई जर्मनीको राष्ट्रिय फुटबल टोलीको प्रशिक्षक बन्न प्रस्ताव पनि आएको छ । मिररका अनुसार जर्मनी फुटबल एसोसिएसनले सफल प्रशिक्षकको रुपमा दरिएको जोचिम लोको उत्तराधिकारीको रुपमा क्लोपलाई अनुबन्ध गर्ने प्रयास थाल्ने उल्लेख गरेको छ ।

लिभरपुललाई ठुलो सफलता दिलाएका क्लोपलाई लिभरपुल लामो समय क्लबमै राख्ने योजनामा छ । तर, यो क्लोपको निर्णयमा पनि भर पर्नेछ । क्लोपले भने आफु लिभरपुलमै खुसी रहेको र जर्मनी जाने विषयमा केही पनि नसोचेको बताएका छन् । जर्मनी राष्ट्रिय टोलीमा जोचिम लोको सम्झौता २०२२ सम्म रहेको छ । क्लोपको लिभरपुलमा सम्झौता २०२२ सम्म रहेपनि उनले यसै वर्ष थप दुई वर्षको सम्झौता नवीकरण गरेका थिए ।

क्लोपले एनफिल्डमा ५ वर्ष बिताइसकेका छन् । उनी म्यानचेस्टर युनाइटेडका सर एलेक्स फर्गुसन र आर्सनलका आर्सेनी वेंगर जस्तै एनफिल्डमा विरासत बनाउने प्रयासमा हुनेछन् ।