एजेन्सी – ब्राजिली स्टार प्लेमेकर फिलिपे कौटिन्हो अनुबन्ध गर्न इंग्लिस प्रिमियर लिगका चार क्लबले चासो देखाएका छन् । जर्मन क्लब बायर्न म्युनिखबाट लोनमा खेलिरहेका स्पेनिस क्लब बार्सिलोनाका मिडफिल्डर अनुबन्ध गर्न प्रिमियर लिगका म्यानचेस्टर युनाइटेड, चेल्सी र टोटेनहमसँगै लेस्टर सिटीले चासो देखाएको हो ।

प्रिमियर लिग लिभरपुलका पुर्व स्टार कौटिन्होलाई बार्सिलोनाले २०१८ मा अनुबन्ध गरेको थियो । तर, कौटिन्होले बार्सिलोनामा अवसर नै पाउन सकेनन् । त्यसपछि बार्सिलोनाले कौटिन्होलाई यसै सिजन लोनमा जर्मन क्लब बायर्न म्युनिखमा पठाएको थियो । उनलाई बार्सिलोना र बायर्नले नराख्ने बताइरहँदा प्रिमियर लिगका चार क्लबले उनीमाथि चासो देखाएका हुन् ।

कौटिन्होले यो सिजन बायर्नबाट ३२ खेल खेल्दै ९ गोल गर्दा ६ असिस्ट दिएका छन् । उनलाई अनुबन्ध गर्ने दौडमा सबैभन्दा अघि म्यानचेस्टर युनाइटेड देखिएको छ । बेलायती पत्रिका स्पोर्ट्सका अनुसार युनाइटेडले यसै जनवरीमा अनुबन्ध गरेका ब्रुनो फर्नान्डेजलाई सहजताका लागि कौटिन्हो भित्राउने तयारीमा छ । तर, युनाइटेडले २७ वर्षीय कौटिन्हो अनुबन्ध गर्नका लागि चेल्सी, टोटेनहम र लेस्टर सिटीलाई पन्छाउनुपर्ने हुन्छ ।

कौटिन्होले पुर्व क्लब लिभरपुल फर्कने विषयमा भने अर्कै यात्रामा रहेको बताउँदै तत्कालका लागि सम्भव नभएको बताएका छन् । लिभरपुलका पूर्व प्रशिक्षक ब्रेन्डन रोजर्सले नै कौटिन्होलाई लिभरपुलमा अनुबन्ध गरेका थिए । उनी हाल लेस्टरमा छन् । तर, पछिल्लो अवस्थाले बार्सिलोनाले कौटिन्होलाई स्थयाी रुपमा राख्न सक्नेछ ।

विश्वव्यापी महारमारीको रुपमा फैलिएको कोरोना भाइरस (कोभिड–१९) का कारण विश्व खेलकुद गतिविधि ठप्प रहँदा क्लबहरुलाई पनि आर्थिक संकट हुन सक्ने सम्भावना छ । बार्सिलोनाले सोमबार राति मात्रै क्लबका खेलाडीको ७० प्रतिशत पारिश्रमिक कटौती गर्ने निर्णय गरेको थियो । जसमा खेलाडीहरुले सहमती जनाएका थिए ।