एजेन्सी – इंग्लिस क्लब टोटेनहम हस्टपरले आफ्नो स्टार फरवार्ड ह्यारी केन क्लबमै रहनेमा विश्वस्त रहन नसकिने अवस्था रहेको बताएका छन् । इंग्ल्यान्डका २६ वर्षीय केनले गत आइतबार टोटेनहममा आफ्नो भविष्यबारे शंका व्यक्त गर्दै क्लब छाड्न सक्ने संकेत दिएका थिए । 

केनलाई क्लबमै राख्न टोटेनहमलाई आउदो सिजनमा च्याम्पियन्स लिगमा स्थान बनाउनुपर्ने दवाव छ । टोटेनहम अहिले प्रिमियर लिगको आठौं स्थानमा रहेको छ । प्रिमियर लिगको नतिजाले पनि केनको टोटेनहममा भविष्य निर्धारण गर्न सक्नेछ ।

विश्वमा सर्वश्रेष्ठ सेन्टर फरवार्डको रुपमा स्थापित केनले केहि दिनअघि एक अन्तरवार्तामा आफू सफल खेलाडी हुनका लागि एकै क्लबमा खेलिरहन जरुरी नरहेको बताएका थिए । तर, २०० मिलियन पाउन्ड मुल्य तोकिएको केन अर्काे सिजन पनि लन्डन क्लबमै रहनेमा सम्भावना छ ।

केनलाई अनुबन्ध गर्न प्रिमियर लिग क्लब म्यानचेस्टर सिटी र म्यानचेस्टर युनाइटेडले चासो देखाएका छन् । सिटीले अर्जेन्टिनी सर्जियो अगुइरोको विकल्पमा अघि सार्दा युनाइटेडले पनि उनलाई अनुबन्ध गर्ने योजना बनाइरहेको छ । रियल म्याड्रिड लामो समयदेखि केनको अवस्था अध्ययन गरेर बसिरहेको छ ।

टोटेनहमले शीर्ष चार रहने योजना बनाउने र त्यसमा असफल भए केनलाई जसरी पनि क्लबमा राख्ने योजना बनाइरहेको छ । केनको टोटेनहममा अझै ४ वर्ष सम्झौता रहेको छ । टोटेनहमका अध्यक्ष ड्यानियल लेभीले केनलाई बेच्नुपरेपनि कम्तीमा २०० मिलियन पाउन्डभन्दा कम मुल्यमा नबेच्ने बताएका छन् । लेभीले कोरोना भाइरस (कोभिड–१९) का कारण विश्व फुटबलमा असर परेको र ठुलो मुल्यमा खेलाडी सरुवा कम हुने बताएका छन् ।

केन अहिले चोटका कारण मैदान बाहिर छन् । प्रिमियर लिग ३० अप्रिलसम्म स्थगित गरिएको छ । ३० अप्रिलपछि खेल शुरु हुन सकेको अवस्थामा उनले पनि चोटबाट पूनरागमन गर्न सक्नेछन् ।