एजेन्सी – कोरोना भाइरस कोभिड १९ को विश्वव्यापी रुपमा परेको असरले सुपर स्टार क्रिस्टियानो रोनाल्डोले युभेन्ट्स छाड्न सक्ने अनुमार इटालियन सञ्चारमाध्यमले गरेका छन् । सन् २०१८ मा टुरिन पुगेका रोनाल्डोसँग त्यो क्लब छोड्नु पर्ने अवस्थामा धेरै विकल्प भने हुने छैनन् ।

वास्तविकतालाई हेर्ने हो भने पेरिस सेन्ट जर्मेन र म्यानचेस्टर युनाइटेड रोनाल्डोका लागि विकल्प हुन सक्दछन् । दुवै टोलीको बलियो आर्थिक अवस्था र अन्य कारणले गर्दा उनको नयाँ गन्तव्य हुन सक्दछन् । युनाइटेड रोनाल्डोका लागि सहि गन्तव्य हुन सक्दछ । यनाइटेडसँग सफलताको उनको सम्झना पनि छ । उनी २००३ देखि २००९ सम्म युनाइटेडका महत्वपूर्ण खेलाडी मध्येका एक थिए ।

पिएसजी पनि आर्थिक रुपमा बलियो क्लब हो । टोलीमा स्टार खेलाडी रहने उसको इतिहास र वर्तमान हो । अहिले भएका स्टार नेयमार र केलियन एमबाप्पले मध्ये एकले पिएसजी नयाँ सिजनमा छाड्ने लगभग निश्चित जस्तै छ । त्यस्तो अवस्थामा रोनाल्डो पिएसजीका लागि राम्रो विकल्प हुन सक्दछन् ।

युरोपमा अन्य क्लब पनि सक्षम छन् । तर, धेरैले उनलाई भित्राउन प्रयास नगर्न सक्छन् । पूर्व क्लब रियल म्याड्रिड पनि उनका लागि एउटा विकल्प हुन सक्दछ । यद्यपी दुवै पक्षबीच नयाँ सम्झौताको सम्भवना न्यून छ । बार्सिलोनाले पनि उनलाई भित्राउने प्रयास गर्ने सम्भावना खासै रहदैन । अर्को जित जर्मनीको बायर्न म्युनिखका निर्देशकहरुले उमेर ढल्केका खेलाडीलाई नलिने रणनीति बताएका कारण त्यहाँ पनि उनको सम्भावना नहुन सक्दछ ।

एमएलएस पनि उनको लागि राम्रो विकल्प हुन सक्छ । डेविड बेकह्यामको नयाँ क्लब इन्टर मायमीले अप्रत्यासित खेलाडी अनुबन्ध गर्ने बताइरहँदा रोनाल्डोले उक्त विकल्प पनि रोज्न सक्छन् । यद्यपि त्यसका लागि रोनाल्डोले आफ्नो तलबमा केहि समझदारी गर्नुपर्ने हुन्छ ।

इंग्ल्यान्डको हकमा म्यानचेस्टर सिटी, लिभरपुल र चेल्सी उनका लागि अन्य सम्भावित क्लब हुन् । सिटीले अर्को वर्ष च्याम्पियन्स लिग खेल्न नपाउने गरि प्रतिबन्ध लागेका कारण त्यो उनको रोजाई नहुन सक्छ । लिभपुल र चेल्सी जस्ता क्लबले रोनाल्डो जस्तो सुपरस्टारलाई लिन सम्भावना कम छ । त्यसअर्थ पिएसजी र युनाइटेड मध्ये रोनाल्डोका लागि सहि गन्तव्य हुन सक्ने इटालियन सञ्चारमाध्यमले जनाएका छन् ।