एजेन्सी – ब्राजिलियन विलियनले आफू प्रिमियर लिगमै रहन चाहेको प्रष्ट पारेका छन् । चेल्सीसँगको उनको सम्झौता चार महिनामा सकिँदैछ । ३१ वर्षे विलियन र चेल्सीबीच नयाँ सम्झौता हुन सकेन । अहिले नविकरणका विषयमा छलफल पनि टुंगिएको बताइएको छ ।

अर्को सम्झौता भएन भने उनी जुन ३० मा चेल्सीबाट अलग हुनेछन् । प्रिमियर लिगकै अन्य टोली आर्सनल र टोटेनहमले उनीमाथि चासो देखाइरहेको बताइएको छ । त्यस्तै बार्सिलोनाले पनि ब्राजिलियन विङ्गरलाई लिन सम्भावना रहेको बताइएको छ । तर विलियन भने प्रिमियर लिगमै रहन चाहन्छन् ।

‘प्रिमियर लिगमै रहने मेरो चाहना हो । यद्यपी अन्य लिग खेल्ने विषयलाई पनि मैले पुरै अस्वीकार गरेको छैन,’ उनले भने, ‘यो सिजनको अन्त्यसम्म म यहि खेल्नेछु । त्यसपछि के हुन्छ हेरौं । म इंग्ल्याण्डमै अभ्यस्त छु ।’

उनले पुरानो क्लब कोरियथेन्स जाने कुनै योजना नभएको उल्लेख गर्दै अहिले युरोप मै रहने बताएका छन् । ‘म अहिले आफ्नो जीवनको उच्च विन्दुमा छु । खेलाडीले खेल जीवनभरमा यस्तो अवस्था आउछ,’ उनले थपे, ‘मलाई लाग्छ म अहिले उच्च विन्दुमा छु ।’ उनका पूर्व प्रशिक्षक जोसे माउरिन्हो अहिले टोटेनहममा रहेकाले विलियन त्यहाँ जाने सम्भावना रहेको पनि बताइएको छ । ‘मोउरिन्होको प्रशिक्षणमा मैले धेरे सिकेको छु,’ उनले थपे, ‘हाम्रो बीचमा म्यासेज आदन प्रदान हुन्छ । तर धेरै भयो हाम्रो भेट भएको छैन ।’