एजेन्सी – कोरोना भाइरस कोभिड १९ को महामारीले उत्पन्न गरेको परिस्थितिलाई मध्यनजर गर्दै सुपर स्टार रोनाल्डोले युभेन्ट्ससँग पारिश्रमिक कटौतीका लागि सहमति जनाइसकेका छन् ।

कोरानाका कारण क्लबको आर्थिक अवस्थामा पार्न सक्ने असरलाई हेर्दा भविष्यमा रोनाल्डोलाई राख्न युभेन्ट्स असक्षम हुने अनुमान गरिएको छ । आर्थिक अवस्था कमजोर हुँदा रोनाल्डो जस्तो उच्च पारिश्रमिक भएका खेलाडी राख्न क्लबलाई कठिन हुने सक्ने बताइएको छ ।

पाँच पटकका बालोन डी ओर विजेता दुई वर्षअघि रियल म्याड्रिडबाट टुरिन पुगेका थिए । जहाँ उनले वर्षको ३१ मिलियन युरो बार्षिक रुपमा आम्दानी गर्छन् । युभेन्ट्सले पारिश्रमिक दिन नसक्ने अवस्था बनेको खण्डमा रोनाल्डोले क्लब छाड्न पर्ने अवस्था बन्न सक्छ । त्यो अवस्थामा पोर्चुगिज स्टार ७० मिलियन युरोमा ले अन्य क्लब जान सक्छन् । यद्यपी युभेन्ट्ससँगको उनको सम्झौता अझै २ वर्ष बाँकी छ । त्यसपछि पनि उनले अर्को एक सिजन त्यहि बस्न सक्ने विकल्प पनि छ ।

हाललाई केहि समयका लागि मात्र तलब कम लिन मानेको भएपनि लामो समयका लागि भने क्लब र खेलाडीबीच सोहि किसिमको सहमति नहुन सक्छ । यस्तो अवस्थामा अन्यत्रबाट उचित प्रस्ताव आए खेलाडी र क्लब दुवैको हितका लागि रोनाल्डोले क्लब छाड्न सक्छन् । त्यसो त डेविड बेकह्यामले यसअघि नै अमेरिकी मेजर लिग सकरको आफ्नो क्लब मायामी सिटीमा अनपेक्षित स्टार ल्याउने खुलासा गरेका थिए । रोनाल्डो र बेकह्यामको सम्बन्ध हेर्दा निकट भविष्यमा त्यसको सम्भावना पनि रहेको छ ।