एजेन्सी – ब्राजिलियन पूर्व स्टार रोबोर्टो कार्लोसले आफुसँग त्यस्तो अधिकार भएको भए नेयमारलाई तत्काल रियल म्याड्रिडमा आबद्ध गराउने बताएका छन् । विगतमा पनि ब्राजिलियन नेयमारलाई रियलले ल्याउने प्रयास गरेको थियो । तर, त्यसमा चिर परिचित प्रतिद्वन्द्वी बार्सिलोना सफल भएको थियो ।

कार्लोस त्यति बेला देखि नै आफ्ना देशका फरवार्डको फ्यान थिए । ‘यदि त्यो ममा निर्भर हुन्थ्यो भने उनी केहि समयका लागि भए पनि रियलमा हुन्थे,’ ब्राजिलियनका पूर्व लेफ्ट ब्याक कार्लोसले भने, ‘तर, जीवन सधै हामीले सोचे जसरी अघि बढ्दैन ।’

कार्लोसले हरेक उत्कृष्ट खेलाडी युरोपका उत्कृष्ट क्लबबाट खेल्न इच्छुक रहने बताए । ‘रियलले जो कोही खेलाडीलाई लिन पनि प्रयास गर्न सक्छ ,’ उनले भने, ‘यदि कोही च्याम्पियन्स लिग जित्न चाहन्छ भने त्यो रियलमा जानुपर्दछ ।’

उनले हालै राष्ट्रिय टोलीमा पर्न असफल भएका मार्सेलोको पक्षमा बोलेका छन् । ‘उनी अहिलेको समयका उत्कृष्ट लेफ्ट ब्याक हुन् । हरेक खेलाडीले दोस्रो पटक मौका पाउनु पर्दछ । मार्सेलोको हकमा पनि त्यहि हुन्छ ,’ रियलका पूर्व स्टार कार्लोसले भने, ‘मलाई आशा छ उनी फेरि टोलीमा फर्कनेछन् । उनले आफ्ना ठाँउका लागि फिलिपे लुइस, एलेक्स सान्द्रो र रेना लोडीसँग प्रतिस्पर्धा गर्नेछन् ।’