एजेन्सी – इंग्लिस क्लब लिभरपुलले अर्काे सिजन कम्तीमा पनि चार महिना इजिप्टका आफ्नो स्टार फरवार्ड मोहम्मद सलाहलाई गुमाउने सम्भावना बढेको छ ।

अन्तर्राष्ट्रिय ड्युटी अफ्रिका कप अफ नेसन्स २०२१ र टोकियो ओलम्पिक २०२१ का कारण लिभरपुलले सलाहलाई कम्तीमा पनि चार महिना गुमाउन सक्ने क्लबनिकट स्रोतले जनाएको छ । अफ्रिका कप अफ नेसन्स २०२१ को जनवरी र फेब्रुअरीमा हुने तय छ । यही जुलाई र अगस्टमा तय भएको टोकियो ओलम्पिक अर्काे वर्षसम्मको लागि सरेको छ ।

यसर्थ दुवै प्रतियोगितामा इजिप्टले सहभागिता जनाउने भएका कारण पनि लिभरपुलले सलाहलाई छोड्नुपर्ने हुन्छ । लिभरपुलले सलाहसँगै अफ्रिका कप अफ नेसन्समा साडियो माने, नावी केइटा, जोइल मटिपलाई पनि गुमाउन सक्नेछ ।

सेनेगलमा हुने अफ्रिका कप अप नेसन्समा इजिप्टको कप्तानी सलाहले नै गर्नेछन् । टोकियो ओलम्पिकमा पनि २३ वर्ष मुनिको स्पर्धामा सिनियर खेलाडीको आधारमा सलाहले नै कप्तानी गर्न सक्नेछन् ।

इजिप्ट यु–२३ का प्रशिक्षक स्वाकी घारिवले सलाह विश्वको सर्वश्रेष्ठ खेलाडी रहेको र उनलाई जुनसुकै प्रशिक्षकले पनि टोलीमा बोलाउन चाहने बताएका छन् । उनको लागि ढोका खुला नै रहेको बताएका छन् । उनले यो अवस्थामा खेल भन्दा पनि जनताको जीवन महत्वपुर्ण रहेको र ओलम्पिक स्थगन संसारको लागि राम्रो निर्णय रहेको बताएका छन् ।

सलाहकै उच्च प्रदर्शनमा लिभरपुल अघिल्लो सिजनको च्याम्पियन्स लिगको विजेता बन्न सफल भएको थियो । यसपटक लिभरपुल ३० वर्षपछि प्रिमियर लिगको उपाधिनजिक छ । लिभरपुलले दोस्रो स्थानको म्यानचेस्टर सिटीलाई २५ अंकले पछि पारेको छ । तर, कोरोना भाइरसका कारण प्रिमियर लिग ३० अप्रिलसम्मको लागि स्थगित गरिएको छ ।