एजेन्सी – बार्सिलोनाले समर ट्रान्फरका लागि इन्टर मिलानका लाउटारो मार्टिनेजलाई भित्राउने योजना बनाएको छ । तर, क्लबका पूर्व महान खेलाडी मध्येका एक रिभाल्डोले मार्टिनेजलाई भित्राउने प्रयास तत्कालका लागि गतल निर्णय हुने बताएका छन् । उनले क्लबले आफ्नो शक्ति पूर्व स्टार ब्राजिलियन नेयमारलाई नै पुनः क्लबमा लिन खर्च गर्नुपर्ने बताएका छन् ।

ब्राजिलियन रिभाल्डोको खेल जीवनका केहि महत्वपूर्ण खेल बार्सिलोनासँग छन् । पेरिस सेन्ट जर्मेन (पिएसजी) सँग यथार्थको धरातलमा प्रस्ताव गर्दा बार्सिलोनाले नेयमारलाई पुन भित्राउन सक्ने उनको अनुमान छ ।

‘लाउटारो अहिलेका लागि समस्या समाधान होइनन् । बार्सिलोनालाई बलियो बनाउनका लागि नेयमार नै प्राथमिकतामा हुनुपर्दछ,’ रिभाल्डोले भने, ‘मलाई लाग्छ उनीहरुले नेयमारलाई फर्काउन आफ्नो ध्यान केन्द्रित गर्नुपर्दछ । पहिलाको जस्तै फरवार्ड लाइनलाई बलियो बनाउन त्यो जरुरी छ ।’

उनले बार्सिलोनाले नेयमारका लागि लगानी गर्न सक्ने अवस्थामा रहेको पनि अनुमान गरे । पिएसजी पनि यथार्य प्रस्ताव गरेको खण्डमा स्वीकार गर्न सक्छ । रिभाल्डोले भने, ‘नेयमारलाई फर्काउने योजनामा कुनै खतरा छैन ।’

रिभाल्डोका अनुसार मार्टिनेज अहिले मिलानमा राम्रो गरिरहेका छन् र रोमेलु लुकाकुसँग राम्रो साझेदारी गरिहेका छन् । जसले गर्दा एटोनियो कान्टेको उपाधि चुनौतिलाई सहयोग पुगिरहेको छ । अहिले नै उलाई विश्वास गर्ने अवस्था नआइसकेको रिभाल्डो अनुमान छ ।

‘अहिले उनी मात्र २२ वर्षका भएका छन् । उनीले आफुलाई अझै प्रमाणित गर्न बाँकी छ । उत्कृष्ट खेलाडीका लागि उनले अझै अनुभव बटुल्नु छ,’ रिभाल्डोले भने, ‘भविष्यमा उनी उच्च स्तरीय खेलाडी बन्ने सम्भावना छ ।’ रोनाल्डिन्हो र रिभाल्डोको साझेदारी सन् २००० को समयमा उत्कृष्ट मानिन्थ्यो । उनीहरु दुवै ब्राजिलले विश्वकप जित्दा टोलीका महत्वपूर्ण सदस्य थिए ।

तर अहिले भने जाली पासपोर्ट बोकेको आरोपमा रोनाल्डिन्हो पाराग्वेको जेलमा छन् । ‘उनी पक्राउ परेपछि मेरो कुरा भएको छैन । अहिले म उनलाई हौसलाको सन्देश मात्र दिन सक्छु । मलाई आशा छ सबै विषय सकारात्मक रुपमा टुंगिनेछ,’ उनले भने, ‘आफ्नो जन्म दिनको दिन अरुको देशमा जेलमा रहन्दा कत्ति दिग्दार भयो होला । तर यो सबै घटनाबाट उनी अझै बलियो भएर फर्कनेछन् ।’