एजेन्सी – विश्वव्यापी बनेको कोरोना भाइरस (कोभिड–१९) को महामारीका कारण अहिले विश्वको खेलकुद गतिविधि ठप्प छ । यसबाट कुनैपनि महादेशको खेलहरु अछुतो रहन सकेको छैन ।

यो वर्ष (सन् २०२०) लाई तय भएको तीन ठुला प्रतियोगिता, विश्व खेलकुदको कुम्भमेला टोकियो ओलम्पिक, युरोकप र कोपा अमेरिका कप अर्काे वर्षसम्मलाई स्थगित भइसकेको छ ।
यसबाट कुनै पनि राष्ट्र अछुतो रहन सकेको छैन । यसैक्रममा इंग्ल्यान्ड फुटबल एसोसिएसन (इएफएल) ले इंग्ल्याण्डको पाँचौ श्रेणीको लिग फुटबल नेसनल लिगभन्दा तलका सबै फुटबल यो सिजनको लागि अन्त्य गरेको घोषणा गरेको छ ।

‘नेशनल लिगभन्दा तलका तीन वटा डिभिजन अन्त्य भएको छ । यससँगै लिगमा हालसम्मको नतिजा र अंक हटाइएको छ । यसको अर्थ अब यी लिगमा कुनै बढुवा वा घटुवा हुने छैन ,’ इएफएलले जारी गरेको विज्ञप्तिमा उल्लेख छ ।

यस्तै महिला फुटबलमा पनि तेस्रोदेखि सातौँ तहसम्मका फुटबल अन्त्य गरिएको छ । पुरुष फुटबलअन्तर्गत नन लिगमा जर्सी बुल्स र भाउक्सहल मोटोर्स पाँचौ तहमा बढुवा भइसकेपनि अब यो बढुवा रद्ध हुने भएको छ । कम्बाइन्ड काउन्टिज फुटबल लिग डिभिजन वानमा जर्सी बुल्सले २७ वटा खेल जितेको थियो । शीर्ष स्थानमा रहेको बुल्स २० अंकले अगाडि थियो ।

इएफएलले नेशनल लिग, नेशनल लिग नर्थ, नेशनल लिग साउथ, वुमन्स सुपर लिग र वुमन्स च्याम्पियनसिप जतिसक्दो छिटो सकाउने योजना बनाएको छ । एसोसिएसनले पुरुष एफए कप सम्पन्न गर्नका लागि सबै प्रयास गर्ने जनाएको छ । एफए कप अहिले क्वाटरफाइनल चरणमा पुगेको छ । यस्तै अरु प्रतियोगिताबारे पनि एसोसिएसनले विचार गरिरहेको जनाएको छ । इंग्लिस फुटबलको लागि यो चुनौतीपूर्ण अवस्था हो र सबैखाले निर्णय खेलको राम्रोका लागि गरिएको विज्ञप्तिमा उल्लेख छ ।

एसोसिएसनले यस्तो अवस्थामा आफ्नो प्राथमिकता क्लब, खेलाडी, स्टाफ, अफिसियल, भोलिन्टियर र समर्थकको सुरक्षा एवं कल्याणका लागि निर्णय लिएको जनाएको छ । इंग्ल्याण्डको प्रिमियर लिग लगायत उच्च लिगहरु रद्द गर्ने वा के गर्ने भन्ने निर्णय अझै हुन बाँकी छ । अहिलेलाई इंग्लिस प्रिमियर लिग ३० अप्रिलसम्मको लागि स्थगित गरिएको छ ।