एजेन्सी – आधुनिक फुटबलमा पोर्चुगलका क्रिस्टियानो रोनाल्डो र अर्जेन्टिनी लियोनेल मेस्सीबीच को सर्वाेत्कृष्ट भन्ने बहस भइरहेको छ । तर, को उत्कृष्ट भन्ने छुट्याउन निकै कठिन रहेको छ । एक पक्ष रोनाल्डो उत्कृष्ट रहेको बताइरहँदा अर्काे पक्ष मेस्सी उत्कृष्ट रहेको बताउछन् । केहि फुटबलप्रेमी दुवै खेलाडीको प्रशंसा गर्दै पनि भेटिन्छन् । 

पछिल्लो १२ वर्षमा रोनाल्डो र मेस्सीले ११ बालोन डिओर बाँडेका छन् । यसले पनि आधुनिक फुटबलमा रोनाल्डो कि मेस्सी को उत्कृष्ट भन्ने बहसलाई छुट्याउन कठिन बनाएको छ । यसबीचमा विश्व फुटबलका महान हस्ती ब्राजिली लेजेन्ड पेलेले आधुनिक फुटबलका दुई हस्ती रोनाल्डो र मेस्सीको बारेमा आफ्नो राय राख्दै मेस्सीभन्दा रोनाल्डो सर्वश्रेष्ठ रहेको बताएका छन् ।

‘मेस्सीले ६ पटक बालोन डि ओर जितेका छन् । रोनाल्डोले पाँचपटक जितेका छन् । तर, आजको अवस्थामा रोनाल्डो नै आधुनिक फुटबलको सर्वश्रेष्ठ खेलाडी हो । म रोनाल्डोको पक्षमा छु ,’ पिलहाडोसँगको कुराकानीका क्रममा पेलेले भने, ‘मलाई लाग्छ रोनाल्डो उत्कृष्ट छन् । उनी एकदमै छरिता छन् । तर, हामीले मेस्सीलाई बिर्सनुहुन्न । उनी पनि आधुनिक फुटबलले पाएको उत्कृष्ट फरवार्ड हुन् ।’

७९ वर्षीय पेलेले रोनाल्डो सर्वश्रेष्ठ रहेपनि आफू र मेस्सीबीच केही तथ्यहरु मिल्न सक्ने बताए । ‘हिजो र आजको तुलना गर्दा सबै आ–आफ्नो समयमा उत्कृष्ट रहेको र त्यतिबेला आफु आफै उत्कृष्ट थियो । यो पक्कै पनि गाह्रो प्रश्न हो । जसले राम्रो खेल्यो उही नै उत्कृष्ट बन्ने हो । तर, हामीले जिको, रोनाल्डिन्हो र रोनाल्डोलाई भुल्नुहुदैन । युरोपमा फ्रान्ज बेकेनबोउर र योहान क्राएफलाई भुल्नुहुदैन,’ पेलेले भने ।

पेले पछिल्लो महिनायता हिपको अपरेशनपछि उनी पुरानो अवस्थामा फर्कन संघर्ष गरिरहेका छन् । पेलेले आफ्नो स्वास्थ ठीक हुदै गइरहेको बताएका छन् । छोरा इडिन्होले बुवा पेले घरबाट निस्कन अप्ठेरो मान्ने र यसले निराश निम्त्याएको बताएका थिए ।